A mû na e kungba ti fa nzo tënë
1 A mû na e kungba ti fa nzo tënë. So kota yekiango zo! (1 aThes. 2:4). Ambeni zo ake ti mä kpengba tokua so, me a gboto azo ti bê ti mbilimbili tongana ti so nzoni fungo ti ye agboto azo (2 aCor. 2:14-16). Ti ala so ayeda na nzo tënë na asala ye alingbi na ni, salut si ayeke ku ala (aRom. 1:16). A lingbi e yô kungba so tongana nyen?
2 Jésus na abazengele: Jésus azia lani fango nzo tënë na kozo ndo (Luc 4:18, 43). Atâa na ngoi so lo woko na nzara asala lo, ndoye so lo yeke na ni na mbage ti azo, nga nengo so lo bâ na tokua so apusu lo ti kangbi ni na azo (Marc 6:30-34). Na lege ti tënë nga na tapande ti lo, lo sala si nene ti kusala ti fango tënë ti Royaume angbâ na yâ li ti adisciple ti lo.—Mat. 28:18-20; Marc 13:10.
3 Na mungo peko ti Jésus, abazengele afa tënë ti Royaume na wâ. Atâa na ndembe so a pika ala na a mû yanga na ala ti zia ti fa tënë, “ala zia pëpe ti fa nda ti tënë, na ti fa Tene-nzoni”. (Kus. 5:40-42). Bazengele Paul ahu lani tele pëpe na yâ kusala so (1 aCor. 15:9, 10; aCol. 1:29). Lo haka matabisi ti fango nzo tënë na mbeni kuda so lo yeke na ni na mbage ti amba ti lo azo. Lo yeke lani ndulu ti zia na peko aye ti lo mveni ti yô kungba so.—Kus. 20:24; aRom. 1:14-16.
4 Matabisi ti e laso: Bango na nene ni kungba ti nzoni-kue so a mû na e, ayeke pusu ande e ti gi alege kue ti fa tënë mingi ahon ti kozo (aRom. 15:16). Edward, so mbage ti tele ti lo abuba, ayeke duti lani na yâ ngende ti lo na yanga ti mbeni hôtel na lo sala tënë ti mabe ti lo na azo ti hôtel ni. Me na nzara ti sala ye mingi ahon ti so, lo hunda si a leke na lo mbeni ndo ti lango na yâ kete kutukutu ti yongo na kungba. Na lege ti kutukutu ni, lo sala gbâ ti akilomètre nga kusala ti pionnier teti angu mingi. Legeoko tongana Edward, azo mingi laso aleke aye na yâ dutingo ti ala ti fa tënë mingi ahon ti kozo.
5 Na mungo tapande ti Jésus na ti abazengele, a yeke nzoni e zia laso fango tënë na kozo ndo na yâ fini ti e. Na salango tongaso, e yeke fa so e ye azo nga so e bâ na nene ni kungba ti nzo tënë so a mû na e.