Fango tënë ti Royaume amû lege ti sö fini!
1 A yeke kusala ti kota ahon, so ayeke sala ni na ndo sese na ngoi so. Jéhovah Nzapa, Jésus Christ, na gbâ ti a-ange ayeke bi bê ti ala mingi na ndo ni. Ye ni so ayeke nyen, na ngbanga ti nyen ayeke kota ye mingi? A yeke fango tënë ti Royaume, so amû lege ti sö fini!—aRom. 1:16; 10:13, 14.
2 Azo mingi apensé so e lingbi ti mû maboko na azo mingi ahon tongana e tara ti maï nzoni duti ti sese kue. Azo mingi a yeke sala ngangu kue ti wara siriri, ti kaï akobela, wala ti sala si konomi amaï mingi ahon. Me ye nyen ayeke mû ande maboko mingi ahon na azo?
3 Mbeni kpengba kusala: Tokua ti Royaume afa gi lo mveni nda ti fini, lingu ti apasi ti azo, na oko tâ beku teti ngoi ti kekereke. Nzo tënë amû lege na azo ti ga akamarade ti Jéhovah, na tongaso ti wara “siriri ti Nzapa so ahon bibe kue”. (aPhil. 4:7). A yeke gi tokua ti Royaume si alingbi ti fa mbilimbili na azo lege ti luti na gbele akpale ti fini fadeso. A fa nga tongana nyen ti sö fini na ngoi so a ga ande ti futi sese ti sioni so (1 Jean 2:17). A yeke biani na lege ni pëpe ti sala ngangu kue ti fa ni?
4 Bâ mbeni tapande: na bê ti bï mo yeke na yâ ti mbeni kete kodoro. Azo kue alango awe. Me mo bâ so, gbagba so a leke ti kanga lege na bale ti mû kodoro ni aye ti fâ. Yâ ni akomanse ti suru yeke yeke, na ngu ato nda ti sigigi na pekoni. Nzoni lege ahon ti mû maboko na azo ti kodoro ni ayeke so wa? Ti hiri ngu so ayeke sigigi na ti kiri na ni na yâ bale ni? Ti leke kodoro ni si aga pendere? Pëpe! A lingbi a zingo azo ti kodoro ni so ayeke lango, a fa na ala ye ti sioni so ayeke ga, si ala lingbi ti kpe! Laso, mbeni sioni kpale ayeke hara azo so alango na lege ti yingo (Luc 21:34-36). Teti so fade sese so ayeke hon na yâ ngoi kete, zia e sala ngangu kue ti fa tënë hio mingi na azo so e lingbi wara ala!—2 Tim. 4:2; 2 Pi. 3:11, 12.
5 Ngbâ lakue ti sala kusala ni: Zia e gi alege kue ti wara azo mingi ahon so ayeke na bê ti mbilimbili, ti fa nzo tënë na ala: na da ti ala, na ndo ti alege, na lege ti singa, nga na alege kue so azi. Kusala so Jéhovah amû na e ayeke kusala ti kota ahon so e yeke na ni ti sala. Tongana e sala ni na wâ, ‘fade e sö e mveni na ala so amä e.’—1 Tim. 4:16.