Maï Ngia ti Mo na yâ Kusala ti Fango Tënë
1 Kangbingo nzo tënë amû ngia na zo. Mo yeke wara ngia na yâ kusala ti mo ti fango tënë? Tongana e sala hange pëpe, sese ti sioni so angoro e alingbi ti sala si e yeke na mbito ti fa tënë, ye so asala si e glisa ngia ti e. Salango kusala na yâ avaka so azo ni asala nzala ti tënë ni pëpe alingbi nga ti sala si bê ti e anze. Aye wa, so alingbi ti mû maboko, e lingbi ti sala ti maï ngia ti e na yâ kusala ti fango tënë?
2 Bâ Ye na Nzoni Lê: Batango mbeni bango ndo so ayeke nzoni ayeke mû biani maboko. Mbeni lege oko ti sala ni ayeke ti gbu li na ndo ti kota matabisi ti e ti duti “afon Nzapa na kusala.” (1 aCor. 3:9) Jésus ayeke nga na e na yâ salango kusala so. (Mat. 28:20) Lo yeke mû nga maboko na e na lege ti a-ange. (Mat. 13:41, 49) Tongaso, e lingbi ti hinga biani so Nzapa ayeke fa lege na angangu so e yeke sala. (Apoc. 14:6, 7) Tongaso, atâa salango ye ti ambeni zo na mbage ti kusala ti e ayeke tongana nyen, a sala si azo na yayu aduti na kota ngia!
3 Leke Tele Nzoni: Nzoni lekengo tele asala nga si ngia ti e amaï. A hunda kusala mingi lakue pëpe ti leke tele teti fango tënë. A mû gi apenze-ngbonga kete ti bâ mbeni kota li ti tënë teti lisoro so alondo na yâ afini périodique wala ambeti ti nze so e yeke zia na azo. Soro mbeni fango ye so alondo na yâ “Ye ti Tene na ndo Apériodique,” na yâ Kusala ti Royaume. Bâ mbilimbili supplément ti janvier ti ngu 2002, “Afango Ye So Alingbi ti Sala na Kusala,” wala gi na yâ buku Comment raisonner mbeni kozo tënë so ayeke pika bê ti azo. Fade mo sala nyen tongana mo wara lege pëpe ti kiri tënë na mbeni tënë so azo asigigi na ni lakue ti kanga lege na lisoro? Mo lingbi ti leke mbeni kiringo tënë so fade afa so mo mä tënë ti ala awe, na a gboto lê ti ala na ndo mbeni tënë so ayeke gbu bê ti ala. Buku Comment raisonner amû maboko mingi ti sala tongaso. Salango kusala na aye ti mungo maboko so ayeke kpengba e ande si e lingbi ti fa tënë na ngia.
4 Sambela na Bê Kue: Sambela ayeke kota ye mingi ti wara ngia so aninga. E yeke sala kusala ti Jéhovah, tongaso a lingbi e hunda na Lo mingi ti wara yingo ti lo, so mbeni oko lengo ni ayeke ngia. (aGal. 5:22) Fade Jéhovah ayeke mû na e ngangu ti ngbâ lakue ti fa tënë. (aPhil. 4:13) Tongana e wara kpale na yâ kusala ti e, e lingbi ti sala tënë ni na yâ sambela. Salango tongaso alingbi ti mû maboko na e ti duti lakue na nzoni bango ndo na mbage ti kusala ni. (Kus. 13:52; 1 Pi. 4:13, 14) Tongana e bâ so e yeke na mbito, sambela alingbi ti mû maboko na e ti ngbâ lakue na wâ nga na ngia.—Kus. 4:31.
5 Leke Alege So Azi: Biani, kusala ti e ayeke ga na ngia mingi ahon tongana e lingbi ti wara azo na ti fa tënë na ala. Na gbiango kapa ti mo si mo gue da na da na mbeni ngbonga nde, peut-être na peko ti bekombite wala kozo na lakui, a lingbi ti lë lengo mingi ahon. Mo yeke tingbi na azo na ngoi kue so mo yeke tambela na lege, tongana mo gue ti vo aye, tongana mo yeke na yâ kutukutu, wala tongana mo yeke fono. Ngbanga ti nyen ti leke pëpe mbeni ndulu tënë ti tongo nda ni na ti mû li ni ti ga ndulu na ala so ayeke sala ye na nzobe? Wala na ndo ti kusala ti mo wala na ekole, ndo so mo lingbi ti sala lisoro na azo lâ na lâ. Mo lingbi ti wara lege ti fa tënë na sigingo na mbeni tënë na ndo ti Bible so ayeke zingo nzala ti ambeni zo ti mä tënë ni. A yeke wara anzoni wango na ndo kozo lembeti ti supplément ti Kusala ti Royaume ti janvier 2002. Mungo peko ti awango so alingbi ti maï ngia ti mo na yâ kusala ti fango tënë.
6 Teti so ngia amû maboko na e ti gbu ngangu, so tâ kota ye ti bata ni! Na salango tongaso, fade e yeke wara ande mbeni kota matabisi tongana kusala so ayeke kiri ti sala ni mbeni pëpe ahunzi. Gi ti bi bê na ndo pendere beku so alingbi ti maï ngia ti e na yâ kusala ti fango tënë.—Mat. 25:21.