Songo ti A-Chrétien Ayeke Kota Ye Tongana Nyen?
1 “Zo oko pepe ayeke mbeni zoa.” Tene so ti mbeni wasungo asuma-tene ti siècle 17 afa tâ ye so Bible atene na ndo ti kota ye so a lingbi zo awara: songo ti azo. (aProv. 18:1) Songo ti e ti aChrétien akanga ndo ti ye so. Na yâ anzoni lege wa?
2 Na yâ kusala ti fango tene: Mbeni oko ti akota ye ti nzoni ayeke lege so aita ti e akpengba e na amu maboko na e na yâ kusala ti fango tene na gbele azo. Jésus ato adisciple ti lo “use use” ti fa tene. (Marc 6:7; Luc 10:1) Na salango ye alingbi na tapande so, tongana e fa tene legeoko na ambeni zo na yâ kusala ti fango tene, e ba gango tâ tene ti Zo-ti-fa-tene 4:9, 10. Tongana e yeke sala kusala ti e legeoko, mabe, mango yanga, na ndoye ti afon e akpengba e na ayeke kiri ti mu ngangu na wâ ti e.
3 Ti wara mungo maboko: Songo ti aita ti e ayeke nga mbeni lingu ti mungo ngangu na ayeke fa lege na e ti luti na gbele aye ti ngangu na ti hon ndo ti atara. Afon e aChrétien alingbi ti gboto lê ti e na ndo ti ambeni versê so andu e mveni. Ala lingbi même ti sambela teti e, legeoko tongana ti so e sala teti ala. (2 aCor. 1:11) Na biani nzo tapande ti ala ayeke pusu e ti sala anzo kusala nga akpengba e.
4 Na abungbi: Tongana e gue lakue na abungbi ti kongregation, e yeke wara lakue deba nzoni ti songo ti e na afon e aChrétien. (aHéb. 10:24, 25) Kapa ni asi singo na afango ye ti yingo, nga gango ti e na abungbi abata e ndulu na afon e awamabe. Abungbingo tele so amu lege na e ti mä aita ti e ti koli na ti wali ti yingo na fango na gigi mabe ti ala, atä na ndo ti estrade wala na popo ti azo so aga. (aRom. 1:12) Songo so ayeke na popo ti e akiri akpengba tongana e sala lisoro na popo ti mba kozoni nga na peko ti abungbi. Angoi tongaso amu lege na e ti sala tene na ndo ti aye so asi na e mveni so akpengba mabe. A sala ye ti nzoni na ndo salango ye ti e tongana e bungbi na bê ti e mveni na azo so andoye Jéhovah, Tene ti lo, kusala ti lo, na azo ti lo.—aPhil. 2:1, 2.
5 Afon e aChrétien ayeke kota ye teti e. Tongana ala yeke dä pepe, ti tambela na ndo ti lege so akono pepe so ague na fini ayeke duti ande ngangu na e mingi. Ye oko, na lege ti ndoye nga na mungo maboko ti ala, e lingbi ti ngbâ ti tambela ti si na yâ fini sese ti Jéhovah so mbilimbili aduti dä.—Mat. 7:14.