Apendere, I Pusu Ye ti Sioni Yongoro na I! —Zo-ti. 12:1 (11:10, NW ).

¹ Apendere, article so aba i na mbeni lege so ayeke nde mingi. A sigigi na ni la ni awe na 1980 na, ti ambeni na popo ti i, a yeke zo so ayeke ga ande babâ wala mama ti i si amanda ni la ni. Na ngoi ni so, ala so ayeke ga ande ababâ na mama ti i angbâ pendere mingi. A yeke ye ti nzoni pepe ti ba so ala ngbâ be-ta-zo na ala bata i nzoni na ndo lege ti Jéhovah? Kite ayeke pepe so i yeke na nzala ti mu tapande ti ala. Nde na so, peut-être mo yeke gi mo oko na yâ sewa ti mo so ahinga Jéhovah. Me atä dutingo ti mo ayeke tongana nyen, e bi bê so fade atene so ayeke fa na peko ge ayeke gbu bê ti mo.

² Lawa e yeke biani na tâ ngia na bê ti e anzere? Kite ayeke pepe so a yeke na ngoi so e yeke zia ngia na bê ti Babâ ti e ti yayu. Apendere, a yeke fadeso, na lâ ti maseka ti i, pendere ngoi ti bi bê nzoni na ndo Wasalango i. Ngbanga ti nyen? Tongana mo gi nda ti atene ti Salomon na Zo-ti-fa-tene 12:2 na 12:3 (11:10 na 12:1, NW), mo yeke diko na yâ ni so angangu ti salango kusala ayeke kiri na peko na “lâ ti sioni” ti gango mbakoro.

³ Mo lingbi ti hunda tele ti mo: “Ye nyen Jéhovah ayeke ku na mbage ti mbi?” Ambeni pendere abi bê so Nzapa aye pepe ti woko yâ ti salango ye ti lo, lo yeke sala ye na ngangu mingi na même so lo yeke na nzoni bango ndo pepe na ndo ala, na lo yeke hinga pepe aye so atia ala nga pepe ye so agbu bê ti ala. Ala lingbi ti duti na bibe so ti sala na Nzapa ayeke kanga lege na ala ti wara nzoni ngoi. Me a yeke tongaso biani? Oko pepe, mbilimbili tongana e gbu li na ndo aversê tongana Zo-ti-fa-tene 12:1a (11:9a, NW), aProverbe 27:11 na Psaume 103:5. Ye oko, a yeke kota ye ti tene mo bata na li tene so: e kue e yeke kiri ande tene na Jéhovah teti akusala ti e. (Zo-ti. 12:1b [11:9b, NW]) Jéhovah amu lege na e ti sala kusala na ngangu ti e ti soro ye e mveni, na fade lo yeke bata e nde pepe na aye ti vundu nga na akpale so ayeke ga na peko ti mbeni sioni tambela. Tongana e sala ngia na wâ, a yeke zö e. (Ba aProverbe 6:27, 28.) Na mungo pepe peko ti salango ye so abi bê na ye oko pepe, so ayeke sioni wala so ayeke ti kion, mo yeke bata tele ti mo na amara ti kpale nde nde.

⁴ Mo hinga ambeni pendere so ayeke na ngu ti mo so abi tele ti ala na yâ akusala ti sioni, asalango ngangu wala so ayeke bi tele ti ala na yâ sioni tambela? Ala yeke na ngia? Mo bi bê so ala nzere na Jéhovah? Nde na so, a yeke polele pepe so apendere so asala ye so bê ti Nzapa aye ayeke na mbeni dutingo so ayeke na ngia nga na siriri mingi ahon? Mo lingbi ti kiri tene: “A yeke tâ tene, me tenengo ni ayeke senge, salango ni ayeke ngangu.” Biani; ye oko, apendere mingi awara lege ‘ti pusu ye ti sioni yongoro na ala’ teti so ala tomba peko ti aye so ayeke nzoni.​—Zo-ti. 12:2 (11:10, NW).

⁵ Na tapande, apendere mingi ayeke sala kusala ti pionnier auxiliaire ngoi na ngoi. Mo tara ti sala kusala so awe? Tongaso pepe, ngbanga ti nyen ti sala lisoro pepe na ababâ na mama ti mo nga na a-ancien na ndo lege ti sala kusala tongana pionnier auxiliaire? Kite ayeke pepe so ala yeke duti ande na ngia ti mu maboko na mo. Anzoni ye wa mo yeke wara na pekoni? (1) Jéhovah ayeke wara ngia. (2) Teti mo yeke sala kusala mingi na Tene ti Nzapa, fade mo yeke hinga ni nzoni ahon. (3) Fade mo yeke manda ti zia bê kue na Jéhovah na yâ sambela na ti ku ti wara anzoni lengo na mbage ti Lo. (4) Na bingo tele ti mo tongaso na yâ kusala, fade mo yeke kono tâ ngia ti mo. (5) Fade mo yeke wara lege ti sala kusala ndulu na azo so ayeke sala kusala na wâ na yâ kongrégation na ti maï anzoni songo so aninga. (6) Na nda ni, atä ye so mo yeke sala ande, fade mo yeke sala ni nzoni ahon teti mo maï na lege ti yingo.​—Mat. 6:33.

⁶ Fade mo yeke sala kusala wa tongana mo hunzi mandango mbeti ti mo? Mo yeke gbu li na ndo ni? Mo zia na gbele mo mbeni ye ti si dä? Peut-être mo ye ti sala mbeni kusala wala mo zia na gbele mo ti sala mariage na ti leke mbeni sewa? Atä so aye so ayeke sioni pepe, a mu lege na mo ti zia biani Nzapa na kozo ndo na yâ fini ti mo? Mo gbu li biani na ndo lege ti ga pionnier permanent wala ti sala kusala tongana missionnaire na mbeni kodoro wande? Mo ba tongana nyen ti ga ti mu maboko na e teti ambeni ngu na Béthel? So ayeke ambeni pendere ye so ayeke nzoni zo azia na gbele lo ti wara! Sala kusala ti wara ni, pusu ye ti sioni yongoro na mo na tara angia ti kusala ti ngoi kue teti Royaume ti Nzapa so ayeke yanga-ti-komande so na yâ ti ngoi kete ayeke mu li ni na aye ti sese.​—Dan. 2:44.

⁷ Biani, a lingbi a gbu zo na ngangu pepe ti sala mbeni ye so lo ye pepe. Ye oko, zia e gbu li na ndo atene so Salomon asû na gbe ti yingo: “Lâ ti pendere na printemps ti fini ayeke senge senge.” Ye nyen a lingbi ti manda na lege ti tene so? Zo ayeke ngbâ pendere teti lakue lakue pepe. Angia na aye so dutingo na ngangu ti pendere ayeke mu lege na ni ayeke ngbâ teti mbeni ngoi so zo ahinga pepe. Tongana azo kue, kobela na kui alingbi ti gbu apendere. Ala so aba atâ tene so na nene ni pepe ayeke sala ande kusala peut-être pepe na ndara na aye so ala yeke na ni, na ala yeke buba angangu ti ala nga na akode ti ala na yâ mbeni dutingo so ayeke sala si angu ti ala ti kekereke ayeke duti ngangu mingi ahon. Biani, a yeke nda li ni si Salomon asû na mbeti atene so ayeke na Zo-ti-fa-tene 12:4, 5 (12:1, 2, NW).

⁸ A yeke pepe aye so alingbi agbu li na ndo ni? Sala lisoro na ndo atene so na ababâ na mama ti mo wala na mbeni ndeko ti mo Chrétien biazo. Sambela Jéhovah ti tene lo mu na mo ndara ti lo. A yeke na mo ti “pusu ye ti sioni yongoro” na ti duti na fini so “zendo ayeke dä, zendo ti fini ti laso, na ti fini so ayeke ga nga.” (1 Tim. 4:8) E yeke na beku so fade mo yeke sala tongaso tongana mo leke na bê ti mo ti duti na mbeni fini so afa na gigi mabe so akpengba na tâ ndoye teti Kota Wasalango e.