Atënë so azo ahunda

Eskê a yeke na ngoi so Satan atene na Éve so lo yeke kui ape tongana lo te lê ti keke ti hingango nzoni na sioni la lo sigi na tënë ti âme so ayeke kui ape na Ève, tënë so amû ndo laso so?

Zabolo atene na Ève ape so tongana lo te lê ti keke so Nzapa atene na lo ti te ni ape, mitele ti lo ayeke kui me yingo ti lo ayeke ngbâ na fini na mbeni ndo. Satan asara tënë na lege ti mbeni ngbo lo tene so tongana Ève ate lê ti keke ni, ‘ti tâ tënë ni lo yeke kui’ ape. Lo ye ti tene so lo yeke ngbâ na fini nga so lo yeke duti nzoni mingi na ndö ti sese sân ti tene Nzapa akomande lo.—Gen. 2:17; 3:3-5.

So fango ye ti wataka so a yeke fa ni na azo laso atene âme ayeke kui ape abâ gigi na yaka ti Éden ape so, a bâ gigi lawa? E hinga mbilimbili ape. E hinga so a zi avorongo nzapa ti wataka kue na ngoi ti kota ngu so apika na ngoi ti Noé. So gï Noé na azo ti sewa ti lo la asö kuâ na ngoi ti kota ngu ni nga ala kue ayeke voro tâ Nzapa, mbeni zo ti fa aye ti wataka ayeke lani dä ape.

Tongaso, fango ye so laso atene âme ayeke kui ape adoit ti komanse na peko ti kota ngu so apika. Na ngoi so Nzapa asara si azo atene ayanga ti kodro nde nde na Babel nga ala “kangbi na ndö ti sese kue,” kite ayeke dä ape so ala hon na pensé so atene azo ayeke na âme so ayeke kui ape (Gen. 11:8, 9). Atâa fango ye ti wataka so akomanse lawa, e hinga biani so Satan Zabolo, “babâ ti mvene”, ayeke na peko ti mvene so nga a nzere na lo ti bâ so amû ndo.—Jean 8:44.