Zo oko apeut ti kpe kuâ ape
IMAGINÉ so mo yeke bâ mbeni film na ndö ti mbeni zo so iri ti lo awu mingi, peut-être mbeni kota zo ti pikango mozoko so mo ye ka lo mingi. Na début ti film ni, a fa zo ni na kete ti lo na temps so lo ngbâ ti manda ti joué bia fani mingi. Na pekoni, a fa lo na temps so lo ga mbeni kota zo ti pikango mozoko so ayeke gue na ando nde nde. A gue ngbii, a ngbâ a fa lo na temps so lo ga mbakoro; na nda ni, mo ye ti bâ lo kui.
Film so ayeke gï mbeni senge mbaï tongaso ape, a yeke mbaï ti mbeni zo so laso lo kui awe. Même si lo yeke fade mbeni wandara, mbeni wanguru, wala mbeni zo so azo ahinga lo mingi, mbaï ni ayeke duti fade gï même. Zo ni ayeke sara gbâ ti anzoni ye, me gbu li ti mo na ndö ti aye so lo peut fade ti sara encore tongana fade lo ga mbakoro nga lo kui ape.
A yeke ye ti mawa, me a yeke ye so ayeke ku e kue la (Zo-ti-fa-tene 9:5). Atâa nyen la e sara, e peut ti kpe pëpe ti ga mbakoro wala ti kui. Na ndö ni, gigi ti e apeut ti hunzi gï hio tongaso na lege ti mbeni accident wala mbeni kobela. Tongana ti so Bible afa, e yeke tongana guru ti ngu so “asigi teti kete ngoi si na pekoni agirisa.”—Jacques 4:14.
Ti ambeni zo, gigi ayeke ye so zo ahinga li ti lo na ni ape, ni la ala yeke sara ye alingbi na tënë so atene “zia e te, e nyon ngbanga ti so kekereke e yeke kui kuingo.” (1 aCorinthien 15:32). Ala yeke sara ye tongaso ndali ti so ala hinga so ala peut ti kui na ngoi kue nga ala yeke na beku ape. Ni la lawa lawa, surtout tongana akpale asi na mo, mo peut ti hunda terê ti mo, mo tene: ‘Gigi ni kue awe la?’ Na ndo wa la mo peut ti wara kiringo tënë na hundango tënë so?
Azo mingi laso abâ so awandara la apeut ti kiri tënë na ni. Awandara nga na adocteur awara ambeni ye so apeut ti sara si fini ti azo ague ayo. Na même laso, ambeni angbâ ti gbu li ti ala ti bâ ye so ala peut ti sara ti tene gigi ti zo aninga. Me atâa ala réussir wala ala réussir ape, ahundango tënë so angbâ lakue: Ngbanga ti nyen la e yeke ga mbakoro nga e yeke kui? Eskê mbeni lâ kuâ apeut ti duti dä encore ape? Ambage so ayeke ga so ayeke sara tënë na ndö ni nga ayeke kiri tënë na hunda so atene: Gigi ni kue awe la?