Atënë so azo ahunda

Tongana mbeni koli na mbeni wali so asara mariage ape, ala use, alango na yâ ti mbeni da oko sân mbeni nzoni raison, so afa so ala sara siokpari so a lingbi a sara komite ti ala?

En. Tongana ala lango gï ala use na yâ ti mbeni da sân mbeni nzoni raison ayeke mbeni kpengba ye so afa so ala sara lango-sioni. Tongaso, tongana mbeni nzoni raison ayeke dä ape, a lingbi a sara komite ti ala.​—1 aCor. 6:18.

Bungbi ti a-ancien ayeke bâ ye ni nzoni ti bâ wala a lingbi a sara komite ti ala. Na tapande: Eskê azo ni ayeke bâ terê ndali ti mariage? A-ancien amû wango na ala ândö awe na ndö ti sarango ye ti ala na terê ti mba? Ngbanga ti nyen la ala lango da oko? Ala leke kozo ti sara ni? Mbeni ye nde so ala lingbi ti sara ayeke dä ape? Mbeni ye la asi so ala lingbi ti sara mbeni ye nde ape, na tapande mbeni ye so ala ku terê ti ala na ni ape, wala mbeni ngangu kpale la asi so ala lingbi ti sara mbeni ye oko dä ape me gï ti lango ala use awe? (Zo-ti. 9:11). Ala lango na ndo wa? Teti so araison ni ayeke nde nde, ambeni ye nde alingbi ti duti dä so a lingbi a-ancien ni abâ.

Tongana bungbi ti a-ancien abâ aye so kue awe, ala yeke bâ wala a lingbi a sara komite ti azo ni.