KOTA MAMA-TENE NI | MO LINGBI TI MÄ YÂ TI BIBLE
Aye ti nzoni wa la zo ayeke wara ni tongana lo mä yâ ti Bible?
“Bible ayeke mbeni mbeti ti Nzapa so azo ahinga ni mingi. Me aChinois ahinga ti ala ni ape nga a sigigi na ni ndali ti ala ape.”—LIN, CHINE.
“Asingana ambeti ti nzapa ti aHindou so mbi peut même ti mä yâ ni ape so, si Bible la mbi peut ti mä yâ ni?” —AMIT, INDE.
“Mbi hinga so Bible ayeke mbeni mbeti so aninga, nga mbi mä a tene so mingi ti azo ayeke na ni. Me ade mbi bâ ni lâ oko ape.”—YUMIKO, JAPON.
Na yâ ti dunia mobimba, azo mingi abâ Bible na nene ni mingi. Me, ala hinga atënë ti yâ ni mingi ape, wala ala hinga nga ni kete ape. Mingi ti azo so ayeke na Asie, nga na akodoro so a kangbi Bible dä mingi, ahinga Bible nzoni ape.
Me, peut-être mo hunda tere ti mo, mo tene: ‘Ngbanga ti nyen a yeke nzoni mbi gi ti mä yâ ti Bible?’ Tongana mo mä yâ ti aye so Bible atene, a yeke aidé mo ti:
Duti na ngia
Ti hinga ti leke akpale ti yâ ti sewa ti mo
Ti gi bê ti mo ahon ndo ni ape
Ti duti na nzoni songo na amba ti mo
Ti hinga ti sara kua nzoni na nginza ti mo
Bâ tapande ti mbeni wali so iri ti lo ayeke Yoshiko, na Japon. Lo hunda tere ti lo wala nyen la ayeke na yâ ti Bible, na lo décidé ti diko ni lo wani. Me nyen la lo wara na pekoni? Lo tene: “Bible a-aidé mbi ti hinga ndani so mbi yeke na fini nga ti duti na beku ti kekereke.” Lo kiri lo tene: “Mbi hinga fadeso ye so mbi peut ti sara na yâ ti gigi ti mbi.” Amit, so e sara fade tënë ti lo na tongo nda ni, adécidé nga ti diko Bible lo wani. Na pekoni, lo tene: “Mbi croire ape, Bible ayeke tâ na anzoni sango ndali ti zo oko oko kue.”
Bible aga na anzoni ye mingi na gbâ ti azo. Ni la, e wa mo ti manda ni mo wani, tongaso si mo bâ anzoni ye ni so.