KIRINGO TËNË NA AHUNDA TI AZO

Gigi ti kekereke ti azo ayeke duti ande tongana nyen?

Kite ayeke dä ape so awandara ayeke ngbâ ande ti gue gi na li ni ti sigigi na ambeni fini ye. Me, eskê ala yeke na ngangu ti sara si, mbeni lâ, azo ti yâ ti dunia kue aga azo so ayeke bi bê na amba ti ala? Oko ape. Laso na yâ ti dunia kue, azo aye ti pensé gi na ala wani nga ala yeke sara bê ti ye mingi. Me, Nzapa aleke mbeni nzoni ye ndali ti azo.—Diko 2 Pierre 3:13.

Bible asara tënë ti mbeni gigi ti kekereke, so na yâ ni azo ayeke ye tere na popo ti ala. Azo ayeke duti ande sân mbeto, nga mbeni zo ti sara sioni na ala ayeke duti ande dä ape.—Diko Michée 4:3, 4.

Tongana nyen la a yeke zi ande sioni bibe so na yâ ti azo?

Lani na tongo nda ni so Nzapa asara azo, lo zia pëpe sioni bibe so na yâ ti bê ti ala. Me, na ngoi so Adam ake yanga ti Nzapa, lo ga zo so siokpari ayeke na tere ti lo. E azo, e wara sioni bibe so na mbage ti lo. Me, Nzapa ayeke sara ande kua na Jésus ti kiri na azo na yâ ti mbeni dutingo so siokpari ayeke duti ande dä ape.—Diko aRomain 7:21, 24, 25.

Ti gue oko na ye so bê ti Nzapa aye, Jésus amû lani fini ti lo tongana mbeni sandaga, na lo zi aye so aga na peko ti kengo yanga so Adam ake lani (aRomain 5:19). Ni la, Jésus asara si mbeni pendere gigi ti kekereke ayeke duti ande dä, so na ngoi ni kâ azo ayeke duti ande mbeni pëpe na bibe ti sarango ye ti sioni.—Diko Psaume 37:9-11.