Vundu ti peko ti kuâ

Tënë ti kuâ ayeke sara ka azo nzoni ape. Ni la, azo mingi aye ti sara tënë na ndo ni ape. Me nyen na nyen, zo alingbi ti kpe ni ape, nga vundu ti peko ni ayeke son ka mingi.

Tongana babâ wala mama ti e akui, wala koli wala wali ti e wala molenge ti e la akui, a yeke ka ngangu na e ti yeda na ni. Kuâ ni alingbi ti si gi gbagburu tongaso wala a yeke mbeni kobela so aninga na tere ti zo ni wala mbeni ye nde so e hinga e tene gbândä zo ni ayeke kui. Atâa a yeke so wa, zo oko alingbi ti kpe vundu ti peko ti kuâ ape, na a lingbi ti sara e nzoni ape.

Antonio, so oto akpo babâ ti lo si lo kui, atene: “A yeke tongana ti so mbeni zo akanga yanga-da ti mo, lo mû aclé ni lo hon na ni. Lege ti kiri na yâ ti da ni ayeke dä ape, même kete tongaso ape. Oko ye so angbâ na mo ayeke gi aye so angbâ na yâ ti li ti mo. Mo ye wala mo ye ape, so gigi ti mo fadeso la, na mo lingbi ti changé ni ape, atâa so na mo, a yeke na lege ni oko ape.”

Dorothy nga kue awara mara ti kpale ni so. Koli ti lo akui na ngoi so Dorothy ni ayeke na ngu 47, na lo ye lani ti wara kiringo tënë na ambeni hundango tënë. Lo yeke fa ka lani ye na Ekole ti dimanche. Na lo, zo ayeke ngbâ na fini na peko ti kuâ ti lo, me lo de ti hinga mbilimbili tënë na ndo ni ape. Mbeni lâ, lo hunda na pasteur ti Eglize ti lo, lo tene: “Nyen la ayeke si na zo na peko ti kuâ ti lo?” Pasteur ni angbâ atene: “Ti tâ tënë ni, zo oko hinga ape, e ku gi, fade e bâ na lê ti e.”

Me e doit gi ti “ku ti bâ” awe? Mbeni lege ti tene zo ahinga na ye so ayeke si na zo na peko ti kuâ ayeke dä ape?