“Mbi yeke tongana kunda na yâ ti da ti lo”

NA NGOI ti mbeni kapa ti fango tënë so a sara ni hio mingi na yâ ti lango gumbaya na nze ti août ti si na septembre, ngu 1929, awafango tënë ahon 10 000 afa tënë na ando nde nde na yâ ti Amerika. Ala kangbi abuku nga na abrochure 125 000 tongaso na azo. Na popo ti awafango tënë ti Royaume ni, a yeke wara acolporteur saki oko tongaso. Wungo ti ala ague lani na li ni mingi. Na yâ ti mbeti Bulletina a tene so a yeke “mbeni ye ti dongo bê” ti bâ so wungo ti apionnier ague na li ni fani ota na popo ti ngu 1927 ti si na ngu 1929.

Nduru na hunzingo ti ngu 1929, mbeni kota kpale ti nginza ayeke lani dä. Na lango 29 ti nze ti octobre, ngu 1929 ngere ti aye atï na gbe ni mingi na sese ti Amerika asara si kpale ti konomi ayeke lani na yâ ti dunia kue na ngoi ni so. Abanque saki mingi asara kua ape. Azo ti fango yaka afâ yaka mbeni ape. Akota usine akanga. Azi azo mingi na kua. Na ngu 1933 na Amerika, lâ oko oko ayeke tomba azo 1 000 na yâ ti da ti ala so ala mû bon si ala sara na ni so ala futa ni kue ape.

Tongana nyen la apionnier awara lege ti fa tënë na ngoi ti kpale so? Mbeni ye so amû lege na ala ayeke so ala mû a-oto ti ala, ala leke mbeni ye na pekoni tongana da. Teti so a yeke futa ni ape nga a yeke futa lapo ni ape, amû lege na apionnier mingi ti fa tënë na kete nginza so ala yeke na ni.b Na ngoi ti kota bungbi, ala yeke lango na yâ ti ada so ala leke na peko ti a-oto ti ala na ala yeke na bezoin ti futa hôtel ape. Na ngu 1934, na yâ ti mbeti Bulletin a fa anzene nzene ye na ndo ti plan ti lekengo mbeni kete da so alingbi ti tene zo alango dä, na yâ ni mo yeke wara aye tongana ngu, ye ti tongo na kobe, gbogbo so ayeke plier ni nga a kanga mbeni ye na tere ti mur ti yâ ti da ni ti tene dê alï ape.

Na ndo ti sese kue awafango tënë so ayeke na kode ti lekengo aye amû a-oto ti ala, ala leke mbeni ye na pekoni tongana da. Victor Blackwell atene: “Noé ahinga lani ti leke bateau ape, mbi nga mbi yeke lani pëpe na kode ti lekengo ada so a leke na peko ti a-oto.” Me kamême ala leke ni.

Avery na Lovenia Bristow ayeke lani na oto ti ala so mbeni ye ayeke na pekoni tongana da. Avery atene: “Mbi yeke tongana kunda na yâ ti da ti lo: Mbi tambela lakue na da ti mbi na tere ti mbi.” Avery na Lovenia Bristow asara kua ti pionnier legeoko na Harvey na Anne Conrow. Ala leke amur ti da so ayeke na peko ti oto ti ala na carton so acollé ni na goudron. Na ngoi so ala yeke hon na ni fani mingi ambeni carton ni ayeke suru na ayeke tuku. Avery atene: “Lâ oko ade azo abâ mara ti oto tongaso ape nga na pekoni ala bâ nga mara ni ape.” Me Avery atene so Harvey na Anne Conrow nga na amolenge ti ala ti koli use ayeke lani na “ngia mingi na yâ ti sewa ti ala”. Harvey Conrow atene: “Mbeni ye oko amanke e ape nga na ngoi so e sara kua ti Jéhovah e bâ so e yeke nzoni nga lo bâ lege ti abezoin ti e nzoni.” Na pekoni, Harvey na Anne Conrow nga na amolenge ti ala ti koli use ague na Ekole ti Galaad na a tokua ala tongana amissionnaire na kodoro ti Pérou.

Azo ti sewa ti Battaino nga kue ayeke apionnier. Na pekoni so Giusto na Vincenza ahinga so ala yeke dü molenge, ala leke ngbene oto ti ala ti ngu 1929 na mbeni da so “akpa mbeni pendere hôtel” ahon atente so ala lango dä kozo. Ala na molenge ti ala ti wali so ade kete angbâ lakue ti sara kua so ala ye ni mingi, so ayeke ti fa tënë na azo ti Italie so ayeke na Amerika.

Azo mingi ayeda na nzoni tënë, me a yeke ngangu na azo so ayeke na kua ape nga na awayere ti mû offrande ndali ti ambeti ti e. Ala yeke mû lani aye so ala yeke na ni na place ti a-offrande ni. Apionnier use asû na mbeti molongo ti aye so azo so ayeda na nzoni tënë amû na ala wungo ni asi 64. Na bango molongo ti aye so, “a yeke mo bâ mo tene mbeti ti molongo ti aye so a kä na magazin na kete kodoro.”

Fred Anderson awara mbeni zo ti fango yaka so aye ti wara ambeti ti e na so amû lunette so ayeke ândö ti mama ti lo tongana offrande ndali ti ambeti ni. Na pekoni Fred Anderson asi na mbeni yaka, mbeni koli ayeda ti mû ambeti ti e, me lo tene: “Mbi yeke na lunette ti diko na mbeti ape.” Me na ngoi so lo tara lunette so voizin ti lo amû na offrande, lo diko na ambeti ni nzoni. Tere ti lo anzere na lo mû offrande ndali ti ambeti ni nga na lunette ni.

Herbert Abbott ayeke fono na da ti akondo ti lo na yâ ti oto ti lo. Na pekoni tongana lo kä akondo ti lo ota wala osio na gara, lo mû nginza ni lo vo na essence na yâ ti oto ti lo. Lo tene: “Na ngoi so e yeke na nginza ape, a yeke kanga lege na e ape. Tongana e yeke na essence na yâ ti oto ti e, e lingbi ti ngbâ ti gue na ambeni ndo na e yeke na mabe na Jéhovah nga e zia bê ti e kue na ndo ti lo.”

Ye so amû maboko na awakua ti Jéhovah na ngoi ti ngangu so, a yeke so ala zia bê ti ala kue na Jéhovah nga ala leke na bê ti ala ti ngbâ ti sara gi na lo. Na ngoi ti mbeni kota ngu so apika, Maxwell na Emmy Lewis awara lege ti sigigi hio na yâ ti oto ti ala so da ayeke na pekoni kozo ti tene mbeni keke akungbi na atï na ndo ni. Maxwell atene: “Aye so asi so ayeke lani pëpe ambeni ye so alingbi ti kanga lege na e, me a yeke ye so ayeke si ka nga e pensé lâ oko ape ti zia kua ti e. Kua angbâ lani mingi ti tene a sara nga e yeke na nzara ti sara ni.” Bê ti Maxwell na Emmy anze pëpe nga aita amû maboko na ala ti kiri ti leke da ti ala so ayeke na peko ti oto ti ala.

Na ngoi ti akpale so e yeke na yâ ni laso, aTémoin ti Jéhovah kutu mingi ayeke na mara ti bibe ti sacrifice so. Legeoko tongana apionnier ti ândö so, e leke na bê ti e ti ngbâ ti fa tënë juska na ngoi so Jéhovah ayeke tene na e so kua ni ahunzi awe.