Sarango na Nzapa ayeke yorö ti lo
Na ngoi so ambeni pionnier use alï na mbeni da na Kenya ti fa tënë, bê ti ala adö ti bâ mbeni koli so ayeke gi kete kete so ayeke lango na ndo ti gbogbo. Kate ti koli ni ayeke kete mingi nga maboko ti lo ayeke nduru nduru. Na ngoi so e sara na lo tënë ti zendo ti Nzapa so atene “fade zo so azin ahuru tongana tagba,” yanga ti lo ayeke na ngia.—És. 35:6.
A tene na apionnier ni so a dü koli so, so iri ti lo Onesmus, na mbeni kobela so asara si abio ti lo awoko mingi. Même tongana a ndu lo na ngangu ape, abio ti lo ayeke fâ. Teti so yorö ti kobela ti lo ni ayeke dä ape, lo hinga so lo yeke bâ gi pasi na yâ ti tanga ti fini ti lo kue nga lo yeke ngbâ gi na yâ ti vélo ti azo so gere ti ala abuba.
Onesmus ayeda ti manda Bible. Me mama ti lo aye pëpe ti tene lo gue na bungbi, lo fa raison ni lo tene so tongana lo gue na bungbi alingbi ti sara si kobela ti lo ni akiri aga ngangu nga ayeke kiri ti son lo mingi. Tongaso, aita a-enregistré abungbi ni aga na ni na lo, lo mä ni na yanga-da. Na pekoni so Onesmus asara étude nze oku, lo mû desizion ti gue na bungbi atâa nyen la alingbi ti si na lo.
Guengo na bungbi asara si tere ti Onesmus akiri ason ngangu? Ên-ën. Onesmus atene: “Na ngoi ti bungbi, songo tere ti mbi so ayeke kaï ka ape, a kiri na peko kete.” Lo bâ so ayeke ndali ti afini ye so lo manda, so amû na lo beku la lo yeke fadeso nzoni ahon ti kozo. Mama ti Onesmus abâ ye so achangé na yâ ti sarango ye ti molenge ti lo na anzere na lo mingi, ye so asara si lo nga kue lo yeda ti manda Bible. Mama ni atene: “Sarango na Nzapa ayeke yorö ti molenge ti mbi.”
Kete na pekoni, Onesmus aga wafango tënë so ade ti wara batême ape. Na pekoni, lo wara batême na fadeso lo yeke wakua ti mungo maboko. Atâa so gere ti Onesmus nga na mbage ti maboko ti lo abuba, lo yeke na nzara ti sara ye kue so lo lingbi ti sara ti voro Jéhovah. Lo ye ti mû kua ti pionnier me lo yeke gi bê ti lo. Ngbanga ti nyen? Ngbanga ti so lo hinga so lo yeke na bezoin ti tene mbeni zo apusu lo lakue na vélo ti lo. Na ngoi so lo fa kpale ti lo ni na amba ti lo aChrétien, ala tene na lo so ala yeke mû maboko na lo. Ala sara ni, na a mû maboko na Onesmus ti mû kua ti pionnier.
Onesmus agi nga bê ti lo ndali ti kpale ti lo so na ngoi so lo ye ti sara kua ti pionnier permanent. Me, na ngoi ni mbeni versê ti lâ oko oko amû na lo ngangu so lo yeke na bezoin ni. Versê ni ayeke na Psaume 34:9 so atene: “Tara [Jéhovah], na fade mo bâ Lo yeke nzoni!” Na pekoni so Onesmus agbu li ti lo na ndo ti versê so, lo mû desizion ti ga pionnier permanent. Fadeso, lo yeke fa tënë lango osio na yâ ti yenga oko oko nga lo yeke na a-étude so ayeke gue na li ni nzoni na lege ti yingo. Na ngu 2010, lo gue na Ekole ti aPionnier. A nzere na Onesmus mingi so ita so afa ye na ala na ekole ni, a yeke mbeni oko ti aita use so lani afa tënë na lo kpa.
Laso, Onesmus aga nduru ti wara ngu 40 awe. Babâ na mama ti lo akui awe, me aita na yâ ti congrégation ayeke bâ lege ti abezoin ti lo lâ na lâ. Lo kiri singila mingi ndali ti aye ti nzoni kue so lo wara laso, nga lo yeke ku kungo lango so “fade wakodoro atene pëpe, Mbi yeke na kobela.”—És. 33:24.