Jéhovah ayeke ‘yô kungba ti mbi lâ na lâ’
Atâa angangu kpale nde nde ti seni so mbi yeke na ni, so na ambeni ngoi ayeke londo sân ti tene mbi ku tere ti mbi na ni, mbi bâ so Babâ ti e ti yayu amû maboko na mbi na ndoye na yâ ti fini ti mbi kue. Ahon ngu 20 awe la mbi yeke na kota ngia ti sara na Jéhovah tongana pionnier.
A dü mbi na ngu 1956 na mbeni kobela so a iri ni spina-bifida. Teti so akamba so ayeke na yâ ti bio ti peko ti mbi akanga nzoni ape, anerf ti mbi abuba asara si a yeke ngangu na mbi ti tambela nga mbi wara ambeni ngangu kpale ti seni.
Ngoi kete kozo ti tene a dü mbi, mbeni koli na wali ti lo so ayeke amissionnaire akomanse ti manda Bible na babâ na mama ti mbi. Na ngoi so mbi ngbâ kete, gi ambeni wafango tënë oko oko la ayeke na gbata so mbi yeke dä na Usakos, na Namibie. Tongaso, e yeke sara abungbi na sewa. Na ngoi so mbi yeke na ngu mbasambala, a opéré mbi na a zia mbeni ye na tere ti mbi ti mû lege na mbi ti sara inon. Na ngoi so mbi yeke na ngu 14, kobela ti makako asara mbi. Teti so lege ti guengo na lycée ayo mingi, na mbi yeke na akpale ti seni so a lingbi babâ na mama ti mbi abâ lege ni, a sara si mbi hunzi lani lycée pëpe.
Me mbi mû desizion ti kpengba songo ti mbi na Jéhovah. Mingi ti ambeti ti e ayeke lani na yanga ti Afrikaans pëpe, yanga ti kodoro ti mbi. Tongaso mbi manda Anglais ti mû lege na mbi ti manda gbâ ti ambeti ti e. Na ngoi so mbi yeke na ngu 19, mbi ga wafango tënë ti Royaume nga mbi wara batême. Na yâ ti angu osio so aga na pekoni, mbi wara gbâ ti akpale ti seni nga na ambeni ye so asara si mbi yeke na vundu nga na mbeto. Teti so azo ti gbata so mbi yeke dä so aye tere mingi, mbeto ti zo asara si mbi yapu na fango tënë pëpe.
Na ngoi so mbi yeke na ngu 20 na ndo ni, e londo na Namibie e gue na Afrika ti Mbongo, nga ti kozoni na yâ ti gigi ti mbi, mbi wara lege ti sara bungbi na mbeni congrégation. A nzere lani na mbi mingi. Ye oko, a kiri a sara na mbi mbeni opéré. Ti so ni so, a zi mbeni lege nde na yâ ti mbi ti tene mbi sara puru na ni.
Ngoi kete na pekoni, mbi mä mbeni surveillant ti circonscription so asara tënë na ndo ti kua ti pionnier. Atënë ti lo andu lani bê ti mbi mingi. Mbi hinga so mbi yeke na nzoni seni ape nga a yeke duti ngangu na mbi ti sara kua ti pionnier, me mbi bâ tongana nyen la Jéhovah abâ lege ti mbi na yâ ti akpale mingi. Tongaso mbi sû demande ti ga pionnier permanent. Ye oko, akpale ti seni ti mbi asara si a-ancien agi bê ti ala ti yeda na demande ti mbi ni.
Atâa so kue, mbi mû desizion ti sara kua ti fango tënë na ngangu ti mbi kue. Na lege ti mungo maboko ti mama ti mbi nga na ti ambeni ita, mbi leke tere ti mbi mbi fa tënë alingbi na ngbonga ti apionnier na yâ ti nze omene. Ye so afa so mbi ye biani ti sara kua ti pionnier nga so mbi lingbi ti hon ndo ti akpale ti seni ti mbi senge. Mbi kiri mbi sû demande ni, ti so ni so a yeda na ni. Na lango 1 ti septembre, ngu 1988, mbi ga pionnier permanent.
Na ngoi so mbi yeke pionnier, mbi bâ so Jéhovah amû maboko na mbi lakue. Ti fa tâ tënë na afini zo ahon ti bi bê gi na ndo ti kpale ti mbi, a bata mbi, a mû ngangu na mbi nga a mû maboko na mbi ti gue na li ni na lege ti yingo. Mbi wara kota ngia ti mû maboko na azo mingi ti mû tere ti ala na Jéhovah nga ti wara batême.
Akpale ti seni ti mbi angbâ lakue. Me Jéhovah ayeke ‘yô kungba ti mbi lâ na lâ’. (Ps. 68:20). Ahon gi ti mû ngangu na mbi ti luti na gbele akpale ti mbi, lo sara si mbi yeke na ngia na yâ ti fini ti mbi!