Ngbanga ti nyen Bible asara tënë ti ambeni zo sân ti fa iri ti ala?

Na mbeti ti Ruth, mbeni koli so lani lo ke ti sara ye so Ndia ti Moïse ahunda, a fa iri ti lo ape me a iri lo a tene, “Mo zo so”. (Ruth 4:1-12). So a fa a tene azo kue so Bible asara tënë ti ala sân ti fa iri ti ala ayeke anzoni zo ape wala ala kpa ti tene a fa iri ti ala ape?

Ên-ën. Na tapande, ndali ti ndangba matanga ti Pâque so Jésus asara, lo tokua adisciple ti lo ti “gue na yâ ti gbata ni na ndo ti zo tongaso” ti leke aye ni na yâ ti da ti zo ni so (Matthieu 26:18). Ti mo, “zo tongaso” so a sara tënë ti lo ge so ayeke nzoni zo ape wala lo kpa ti tene a fa iri ti lo ape? Ên-ën. Âmanke lo yeke lani mbeni disciple ti Jésus, me teti so a yeke kota ye pëpe ti fa iri ti lo na yâ ti mbaï ni, a fa ni ape.

Na mbage nga, ambeni zo mingi so ala yeke anzoni zo ape, a fa iri ti ala na yâ ti ambeni mbaï ti Bible; nga ambeni mingi so ala yeke anzoni zo, a fa iri ti ala ape. Na tapande, azo mingi ahinga iri ti Ève so lo yeke kozo wali. Me ndali ti so lo pensé gi na lo wani nga lo ke yanga, a sara si Adam asara siokpari na e kue e wara kpale mingi na pekoni (aRomain 5:12). Ti wali ti Noé, Bible afa iri ti lo ape, me so lo pensé gi na lo wani ape, lo mä yanga nga lo mû maboko na koli ti lo na yâ ti kota kua so koli ni asara, e bâ nzoni mingi na pekoni. A yeke polele so, tongana Bible afa iri ti mbeni zo ape, aye ti tene pëpe so zo ni ayeke ye oko ape wala so Nzapa ake lo awe.

Na yâ ti ambaï ti Bible, ambeni zo ayeke dä so asara kota ye, même ala sara kpengba ye mingi, na yâ ti kusala ti Jéhovah me a fa iri ti ala ape. E yeke na tapande ti kete maseka-wali so ayeke lani ngbâa na da ti Naaman, mokonzi ti aturugu ti Syrie. Sân mbeto, lo sara tënë ti prophète ti Jéhovah so ayeke na Israël na wali ti Naaman so lo sara kua na gbe ti lo. Na mbeni kpengba miracle asi (2 aGbia 5:1-14). Molenge ti juge Jephté ayeke mbeni pendere tapande ti zo so ayeke na mabe. Na bê ti lo wani, lo yeda ti ngbâ kumbamba nga ti dü ape, ti sara ye alingbi na zendo so babâ ti lo amû (aJuge 11:30-40). Ambeni psaume 40 tongaso, a hinga pëpe iri ti azo so asara ni, nga ambeni prophète ayeke dä so ala sara akpengba kua me a fa iri ti ala ape.​—1 aGbia 20:37-43.

Tapande so ahon atanga ni kue ayeke ti a-ange. Ala yeke kutu mingi mingi, me Bible afa gi iri ti use: Gabriel na Michel (Daniel 7:10; Luc 1:19; Jude 9). Me atanga ni, a fa iri ti ala na yâ ti ambeni mbaï ni ape. Na tapande, Manoah, babâ ti Samson, ahunda mbeni ange, lo tene: “Iri ti Mo ayeke nyen? si tongana tënë ti Mo aga tâ tene awe, fade e lingbi yä iri ti mo.” Ange ni atene nyen? Lo tene: “Mo hunda iri ti Mbi teti nyen?” Ange so asara tere ti lo kete na lo ke ti wara gonda so gi Nzapa la alingbi na ni.​—aJuge 13:17, 18.

Na yâ ti ambaï oko oko, Bible afa pëpe ndani so a fa iri ti ambeni zo nga ndani so a fa ti ambeni ape. Me azo nga na a-ange so asara na Nzapa sân ti ku ti tene iri ti ala awu na pekoni ayeke apendere tapande ndali ti e.