Mo hinga?

A kiri aleke temple ti Jérusalem na peko ti ngu 70?

JÉSUS afa so mbeni tênë oko ti temple ti Jéhovah ayeke ngbâ na ndo ti mba pëpe. Tënë ti Jésus so asi biani na ngoi so aturugu ti Rome na gbe ti komandema ti Titus afuti Jérusalem na ngu 70 (Mat. 24:2). Na pekoni, Togbia Julien aleke ti kiri ti leke temple ni.

A hinga Julien tongana ndangba togbia ti Rome so ayeke païen. Lo yeke molenge ti ita ti Constantin ti Kota, na a yeke azo ti ngoi ti lo so atene ala yeke aChrétien la afa ye na lo. Me na ngoi so lo ga togbia na ngu 361, lo ke aye so a fa ni na lo. Abuku so asara tënë na ndo ti mbaï airi Julien apostat ndali ti so lo ke afango ye ti eglize.

Julien ake lani azo so atene so ala yeke aChrétien. Mbeni raison ni ayeke peut-être so, na ngoi so lo yeke na ngu omene, azo so atene ala yeke aChrétien afâ babâ ti lo nga na ambeni fami ti lo. Awasungo mbaï ti eglize atene so Julien awa lani aJuif ti kiri ti leke temple ti ala. Lo pensé so ye so ayeke fa so Jésus ayeke lani prophète ti wataka.a

Kite ayeke pëpe so Julien aye lani ti kiri ti leke temple ni. Me ye oko afa pëpe so lo komanse lani biani ti kiri ti leke ni. Na même tongana lo komanse kua ni, e hinga pëpe ye so asara si lo zia kua ni. Atâa ye ni ayeke tongana nyen, ye so e hinga ayeke so Julien asara même ngu use pëpe na pekoni so lo ga togbia la a fâ lo, nga kua ti lekengo temple ni alï ngu.