Jésus atene lani na zo ti sioni so fade lo kue lo gue na yayu?

Hundango tënë so alondo ndali ti so Jésus amû lani zendo na zo ti sioni so ayeke na ndo ti keke na tere ti lo so lo yeke wara fini na Paradis. Jésus atene: “Ti tâ tënë ni, mbi tene na mo laso: Mo yeke duti ande na mbi na Paradis.” (Luc 23:43). Bâ so Jésus afa pëpe ndo so paradis ni ayeke dä. Jésus aye lani ti tene so, zo ti sioni so ayeke duti ande na tere ti lo na yayu?

Kozoni kue, zia e bâ wala zo ti sioni so apeut ti wara fini na yayu. Azo so ayeke wara ande fini na yayu, a lingbi ala wara batême ti ngu nga ti yingo vulu, so ti tene ala ga adisciple ti Jésus so Nzapa asoro ala ti ga amolenge ti lo (Jean 3:3, 5). Mbeni ye so a hunda na ala a yeke ti kpe andia ti Nzapa, ti duti azo so a hinga ala tongana azo so asara ye na lege ni, azo so ayeke be-ta-zo nga ayeke bâ mawa ti zo (1 aCorinthien 6:9-11). Na mbage, a lingbi ala duti be-ta-zo na Nzapa nga na Christ na lâ ti fini ti ala kue na ndo ti sese (Luc 22:28-30; 2 Timothée 2:12). A yeke gi tongana ala sara aye so kue awe si ala peut ti lingbi ti tene a zingo ala ti gue na yayu ndali ti kota kua so ayeke ku ala kâ. Ala yeke duti ande aprêtre nga agbia na tere ti Jésus ti komande dunia teti ngu saki oko.​—Apocalypse 20:6.

Me ti koli so ayeke lani na tere ti Jésus, lo yeke zo ti sioni nga lo kui ndali ti ye ti sioni so lo sara (Luc 23:32, 39-41). Tâ tene, lo bâ lani Jésus na nene ni mingi ni la lo tene na Jésus: “Dabe ti mo na mbi tongana mo ga na yâ ti royaume ti mo.” (Luc 23:42). Koli so awara lani batême pëpe nga Nzapa asoro lo ti ga molenge ti lo pëpe; na ngoi so lo yeke na fini asarango ye ti lo afa pëpe so lo yeke zo ti mbilimbili wala lo yeke be-ta-zo. A yeke duti na lege ni biani ti tene Jésus amû zendo na mara ti zo tongaso ti ga gbia na tere ti adisciple ti lo so angbâ lakue be-ta-zo na lo, nga so ala fa na lege ti sarango ye ti ala so ala yeke azo ti mbilimbili so?​—aRomain 2:6, 7.

Na tapande: Bâ so mbeni zo anzi nginza ti mo na lo hunda mo ti pardonne lo, peut-être mo lingbi ti mû desizion ti gue na tënë ni na gbele ngbanga pëpe. Me mo yeke yeda si mara ti zo tongaso abâ ndo na ndo ti buze ti mo wala ti bâ lege ti asewa ti mo? Mo yeke mû akua tongaso gi na azo so mo yeke tâ na confiance na ala. Legeoko nga, ala so a mû na ala zendo ti wara fini ande na yayu ala doit ti duti azo so Nzapa azia bê ti lo biani na ndo ti ala, so lo hinga ala yeke kpe ande andia ti lo na ngoi so ala yeke komande na ndo ti azo (Apocalypse 2:10). Ni la, atâa so koli so afa so lo changé bê ti lo, lo lingbi pëpe ti tene Nzapa asara mara ti confiance so na lo.

Me Jésus amû zendo na koli so ti tene lo na lo ague na yayu gi na lango ni so? Tënë ni ayeke tongaso pëpe, teti so Jésus wani ague na yayu gi na lango ni so pëpe. Lo sara lango ota “na gbe ti sese”, na yâ ti dû ti kuâ (Matthieu 12:40; Marc 10:34). Même na peko ti so lo zingo na kuâ, lo ngbâ na ndo ti sese lango 40 kozoni si lo gue na yayu (Kusala 1:3, 9). Tongaso, zo ti sioni so alingbi lani pëpe ti gue na yayu legeoko na Jésus na oko lango ni so.

Ni la, zo ti sioni so ayeke gue ti lo na paradis wa? Na peko ti zingongo ti akuâ, fade zo ti sioni so ayeke duti ande na yâ ti paradis na ndo ti sese, paradis so Jésus ayeke lë gbia na ndo ni (Kusala 24:15; Apocalypse 21:3, 4). Ti tene mo hinga ambeni tënë na ndo ti paradis so nga na aye so Nzapa ahunda na mo ti sara, sara tënë ni na mbeni Témoin ti Jéhovah.