“Mo fa ni na akete molenge”

Mo ye ti hinga tâ tënë na ndo ti Nzapa? So ti tene ti hinga lo yeke zo wa, nyen la lo ye nga nyen la lo ye ape? Na yâ ti Bible, Jéhovah Nzapa afa aye kue na ndo ti lo wani. Me zo alingbi ti diko Bible na ti mä yâ ni gi lo wani ape, ngbanga ti so ti mä yâ ti tâ tënë so ayeke na yâ ti Bible ayeke mbeni kota pasa, na zo kue la ayeke wara pasa ni so ape. Zia e bâ tënë so Jésus atene na ndo ni.​—Diko Matthieu 11:25.

Versê ni ato nda ni na tënë so: “Na ngoi ni so, Jésus akiri atene.” Tënë so Jésus atene so ayeke ngbanga ti sarango ye ti ambeni zo. Lo londo ti suku na azo ti ambeni gbata ota ti Galilée so lo sara lani amiracle dä mingi (Matthieu 11:20-24). Peut-être mo hunda tere ti mo, mo tene, ‘Me azo ni so ayeke tongana nyen? Ala wani abâ tâ na lê ti ala amiracle so Jésus asara, me ala kiri ala ke atënë so lo fa nga ala ke ti mû peko ti lo?’ Azo ni ake atënë ti Jésus ni ngbanga ti kpengba-li ti ala ni.​—Matthieu 13:10-15.

Jésus ahinga lani so ti tene e hinga atâ tënë so ayeke na yâ ti Bible, e yeke na bezoin ti mungo maboko ti Nzapa nga ti duti na bê ti mango tënë. Lo tene: “Babâ, mbi sepela mo na lê ti azo kue, mo Seigneur ti yayu na ti sese, ngbanga ti so mo honde aye so na awandara nga na azo so ahinga ndo, me mo fa ni na akete molenge.” Mo bâ ndani so a tene ti hinga tâ tënë so ayeke na yâ ti Bible ayeke mbeni kota pasa so? Jéhovah, lo so ayeke “Seigneur ti yayu na ti sese,” lo lingbi fade ti honde tâ tënë ni wala ti zi ndani na zo so bê ti lo aye. Me lo sara tongaso ape. Ka lo fa ni na ambeni na lo honde ni na ambeni ngbanga ti nyen? Nyen la apusu lo ti sara tongaso?

Jéhovah ayeke fa tâ tënë ni na azo so ayeke na tâ be-ti-molenge, me na azo ti baba ape (Jacques 4:6). Lo honde tâ tënë ni na “awandara nga na azo so ahinga ndo”, so ti tene awandara ti dunia so, so ahinga ye mingi si ala bâ tere ti ala atene ala yeke na bezoin ti Nzapa ape (1 aCorinthien 1:19-21). Me lo fa tâ tënë ni na “akete molenge”, so ti tene azo so aga na mbage ti lo na bê ti ala oko nga so ala sara tere ti ala kete tongana akete molenge (Matthieu 18:1-4; 1 aCorinthien 1:26-28). Jésus, Molenge ti Nzapa, atingbi lani na mara ti azo use so kue. Mingi ti akota zo ti nzapa ti ngoi ni kâ amä lani yâ ti fango ye ti Jésus ape, ngbanga ti so ala yeke na bê ti baba, me asenge zo ti gingo susu amä ti ala yâ ni (Matthieu 4:18-22; 23:1-5; Kusala 4:13). Na nga ambeni kota zo ti mosoro so asara tâ tere ti ala kete aga lani adisciple ti Jésus.​—Luc 19:1, 2, 8; Kusala 22:1-3.

Zia e kiri na ndo ti hundango ndo so ayeke fade na tongo nda ni: Mo ye ti hinga tâ tënë na ndo ti Nzapa? Tongana mo ye ti hinga ni, tënë so a tene Nzapa ayeke fa ni pëpe na azo so ala bâ tere ti ala ala yeke awandara na yâ ti dunia so alingbi ti dë bê ti mo. Me, lo yeke fa ni gi na azo so awandara ti dunia so abâ ala tongana ambumbuse zo. Ni la, tongana mo manda Bible na mo sara tere ti mo kete ti yeda na atënë ti yâ ni, mo lingbi ti duti na popo ti azo so Jéhovah amû na ala pendere matabisi so, so ayeke ti mä yâ ti tâ tënë so Bible afa na ndo ti lo. Mango yâ ti tâ tënë ni so ayeke ga na mo ngia laso nga ayeke gue na mo ti wara “tâ fini”, so ayeke fini ti lakue lakue na yâ ti fini dunia so mbilimbili ayeke duti dä, fini dunia so Nzapa amû zendo ni na so aga nduru awe.a​—1 Timothée 6:12, 19; 2 Pierre 3:13.