Sango na ndo ti mbaï ti bungbi ti e

‘A yeke mbeni pendere tënë so ade azo amä ni lâ oko ape’

A BUNGBI gbâ ti ayongoro keke (so ayo mètre 18) a zia na mbeni ndo na Saskatoon, Saskatchewan, na Canada. George Naish ayôro maboko ti lo lo fa ni, lo hunda lo tene: “A yeke sara nyen na akeke so kue?” A tene na lo so a yeke akeke so lani a leke na ayongoro antenne na ngoi ti Kozo Bira so Amû Sese Kue. Ita Naish atene: “Mbi bâ so e lingbi ti mû akeke so ti leke na antenne ti radio. Ge la e wara pensé ti fa tënë na lege ti radio.” Ngu oko na pekoni, na ngu 1924, radio CHUC akomanse ti sara kua. A yeke lani mbeni oko ti akozo radio so ayeke sara akua-singa na ndo ti tënë ti Nzapa na Canada.

Teti so Canada akono mingi, a yeke mbeni nzoni ndo ti tene a fa tënë dä na lege ti radio. Florence Johnson, so asara lani kua na radio so ayeke na Saskatoon, atene: “Grâce na akua-singa ti radio ti e, tâ tënë andu azo mingi so e lingbi ti wara tere na ala pëpe. Nga teti so radio ayeke lani mbeni fini ye, azo aye mingi ti mä akua-singa kue so a yeke sara ni.” Na ngu 1926, aWamandango Bible (so a iri ala fadeso aTémoin ti Jéhovah) ayeke na aradio ti ala na yâ ti agbata osio ti Canada.a

Tënë ti nyen la mo yeke mä tongana mo zi radio ti mo ti mä mbeni oko ti akua-singa so? Mo yeke mä abia so aita ti congrégation ti ndo ni ahe, mingi ni ala yeke he ni na amozoko wala même akete bungbi ti pikango mozoko. Biani, aita amû nga adiskur nga ala sara alisoro na ndo ti atënë ti Bible. Amy Jones, so asara nga lani alisoro so, atene: “Na ngoi ti fango tënë, tongana mbi fa iri ti mbi na zo so mbi fa tënë na lo, a yeke si so zo ni atene: ‘En, mbi mä ka go ti mo na radio.’”

A-Wamandango Bible so ayeke na Halifax, Nouvelle-Écosse, asara kua-singa ti ala na mbeni lege so ayeke nde na ti mingi ti aradio ti ngoi ni so. Ala yeke sara lisoro na ndo ti mbeni tënë na pekoni ala yeke hunda na azo so amä ni ti pika singa na ngoi ni so ti hunda atënë na ndo ti Bible. Mbeni ita atene: “Kode so aga na aye ti nzoni mingi. E lingbi pëpe ti kiri tënë na ahundango ndo kue ndali ti so a yeke mingi.”

Legeoko tongana ti azo ti ngoi ti bazengele Paul, ambeni zo ayeda na tënë so aWamandango Bible afa me ambeni ake ni (Kus. 17:1-5). Ambeni zo aye mingi tënë so ala mä na yâ ti kua-singa so. Na tapande, na ngoi so Hector Marshall amä tënë ti buku Études des Écritures so aWamandango Bible asara tënë ni na radio, lo vo avolume ni omene. Na pekoni lo tene: “Mbi pensé lani so abuku so ayeke mû maboko na mbi ti fa ye na ekole ti dimanche.” Ye oko, na pekoni so Hector ahunzi ti diko volume I ti buku so, lo mû desizion ti zia eglize ti lo. Lo ga mbeni ita so afa tënë na nzara ni nga lo sara na Jéhovah be-ta-zo juska na kuâ ti lo na ngu 1998. Na tö ti Nouvelle-Écosse, lango oko na pekoni so a mû mbeni diskur na Anglais (The Kingdom, the Hope of the World) na radio, J. A. MacDonald turugu ti kota kamba atene na mbeni ita ti ndo ni, lo tene: “Biri azo ti zoa ti Cap-Breton amä mbeni tënë so ayeke pendere mingi so azo ade amä ni ge lâ oko ape.”

Ye oko, akota zo ti abungbi ti vorongo nzapa asara ngonzo. Ambeni zo ti Eglize Catholique so ayeke na Halifax atene so ala yeke sungba da ti radio so ayeke zia akua-singa ti aWamandango Bible. Akota zo ti abungbi ti vorongo nzapa alï gbe ti ngorogbia asara si gi gbagburu tongaso na ngu 1928, ngorogbia atene so lo yeke kiri ti mû pëpe na ada ti radio so aWamandango Bible ayeke wani mbeti so amû lege na ala ti ngbâ ti sara kua. Ye so apusu aita ti kangbi na azo mbeni mbeti na Anglais (Who Owns the Air?) so na yâ ni ala fa so ala yeda pëpe na tënë so, so ayeke na lege ni pëpe so. Ye oko, akota zo ti ngorogbia ake ti mû na aWamandango Bible ambeti so amû lege na ala ti ngbâ ti sara kua na ada ti radio ti ala.

Ye so asara si bê ti kete groupe ti awakua ti Jéhovah so ayeke na Canada so anze? Isabel Wainwright atene so mo bâ ni kpâ, mo bâ mo tene awato ti ani asö benda awe. Me ni hinga so tongana Jéhovah aye ti tene ani ngbâ ti fa tënë na lege ti radio, lo yeke zia lege pëpe na akota zo ti kodoro ti kanga lege na ani. Ye so aye peut-être ti fa so a yeke nzoni ani changé kode so, na ani fa tënë na mbeni kode so ayeke mû lege na ani ti kiri ti fa nzoni tënë ti Royaume mingi. Ahon ti tene aWamandango Bible so ayeke na Canada azia bê ti ala gi na ndo ti radio ti fa tënë, ala komanse ti bi bê ti ala mingi ti sara avizite na azo na yanga-da ti azo ni. Ye oko, na ngoi ni so lani so, radio amû maboko mingi ti sara si ‘azo amä pendere tënë so ala ade ti mä ni lâ oko pëpe.’—Sango na ndo ti mbaï ti bungbi ti e so alondo na Canada.

[Kete tënë na gbe ni]

[Nduru tënë na lembeti 32]

“E lingbi pëpe ti kiri tënë na ahundango ndo kue ndali ti so a yeke mingi”

[Foto na lembeti 32]

(1) Da ti radio na Edmonton, Alberta (2) Mbeni ita-koli ayeke leke ngangu antenne so ayeke na Toronto, Ontario (3) Yâ ti da ti radio CHUC so ayeke na Saskatoon, Saskatchewan