“Bango li ti mbi aga tâ tënë”

Emilia asara kua ti pionnier me lo zia ni a sara ngu 15 awe. Ade ti ninga ape lo komanse ti pensé na ngia so lani lo yeke na ni mingi na ngoi so lo yeke pionnier, na lo ye ti kiri ti ga pionnier.

Ye oko, kua ti nginza ti Emilia amû ngoi ti lo mingi, na ye so asara si lo yeke na ngia ape. Mbeni lâ, lo dema na lê ti amba ti lo ti place ti kua lo tene: “Mbi ye si angbonga ti kua ti mbi aduti mingi ape!” Chef ti lo amä tënë ni na lo hunda lo ti hinga wala a yeke tâ tënë. Emilia atene na lo so a yeke tâ tënë. Me ndokua ni aye si azo ti kua ni asara kua na ngoi kue. Tongaso a lingbi Emilia abâ mbeni wayinda ti ala ti hunda ti sara kua angbonga mingi ape. Lo leke tere ti lo ti wara tere na wayinda ni nga lo sambela ti tene lo wara ngangu ti sara tënë na mbeto ape.

Na ngoi ti warango tere ni, na mbeto pëpe nga na nengo zo Emilia ahunda na wayinda ni ti zi ambeni ngbonga ti kua ti lo. Lo tene na wayinda ni so na angoi so lo gue na kua ape, lo yeke mû angoi ni so ti mû maboko na azo. Lo tene nga na lo so lo yeke Témoin ti Jéhovah na lo yeke mû maboko na azo ti manda Bible. Lo tene nga so azo mingi ahinga pëpe kangbi so ayeke na popo ti ye so ayeke nzoni na ye so ayeke sioni nga ala yeke na bezoin ti ndara so ayeke na yâ ti Bible ti mû maboko na ala ti mû anzoni desizion. Emilia atene na lo so lo yeke ngbâ ti sara kua nzoni, me lo ye ti sara kua angbonga mingi ape tongaso si lo wara ngoi mingi ti mû maboko na azo.

Wayinda ni amä lo nzoni na lo tene so lo pensé lani ti sara kua ti mungo maboko na azo. Na pekoni lo tene: “Ndali ti araison so mo fa na mbi, mbi bâ so a lingbi mbi yeda na ye so mo hunda. Me mo hinga so nginza ti mo ayeke kiri ande kete?” Emilia atene lo hinga me lo yeke gi ti duti na aye mingi ape na yâ ti fini ti lo tongana a hunda ti tene lo sara ni. Emilia atene nga so lo yeke na ngia tongana lo mû maboko na azo. Wayinda ni atene so lo gonda Emilia mingi ndali ti so lo mû ngoi ti lo ti mû maboko na azo.

Lâ oko a sara mara ti ye tongaso na azo so asara kua na ndokua so ape. Emilia ayeke sara kua fadeso gi lango osio na yâ ti yenga. Mbeni ye so lo ku tere ti lo na ni ape ayeke so a kono nginza so a futa na lo na alingbi na nginza so lani lo yeke wara nze na nze na ngoi so lo sara kua angbonga mingi. Lo tene: “Bango li ti mbi aga tâ tënë, na mbi lingbi ti kiri ti mû kua ti pionnier!”

Mo yeke gbu li ti mo ti changé ambeni ye na yâ ti fini ti mo ti ga pionnier wala ti kiri ti ga pionnier?

[Tënë na lembeti 32]

Wayinda ni atene so lo gonda Emilia mingi ndali ti so lo mû ngoi ti lo ti mû maboko na azo