Sarango nzoni na zo asara si ngonzo adë

NA NGOI so George na Manon, aTémoin ti Jéhovah na Pays-Bas, aga ti fa nzoni tënë ti Royaume na Rie so ayeke mbeni mbakoro-wali, lo sara ye na ala na nzoni bê pëpe. A tene na ala so akoli akui na li ti lo fani use, molenge ti lo ti koli akui nga lo bâ pasi mingi na mbeni ngangu kobela so ayeke tongana rhumatisme. Atâa so na ngoi ti lisoro ni lo duti kpô, lo sara ye na nzoni bê na ala oko pëpe.

Me, George atene na Manon ti tene ala ga na mbeni fleur na wali ni ndali ti so na bango lo lo yeke gi lo oko nga vundu ahon ndo ti lo. Na ngoi so ala ga na fleur ni, li ti Rie akpe kue. Ye oko, a yeke lani na mbeni ngoi so alingbi na kapa ti lo pëpe, na ala leke ti kiri na mbeni lango nde. Na ngoi so George na Manon akiri na lango so ala mä tere dä, zo oko ayeke dä pëpe. Atâa so ala ga na angoi nde nde ti wara lo, ala wara lege ti tingbi na lo pëpe. Ala komanse ti pensé so lo yeke kpe ala kpengo la.

Mbeni lâ, George awara Rie na yanga-da. Rie ahunda pardon ndali ti so lo ku ala na ngoi so ala mä tere dä so pëpe na lo fa so lo yeke lani na hôpital. Lo tene: “Mo hinga ye so mbi sara na peko ti so ala hon? Mbi komanse ti diko Bible!” Lo na Rie asara mbeni pendere lisoro na lo to nda ti manda Bible.

Na ngoi so Rie ayeke manda Bible, lo changé lo ga mbeni zo so ayeke na ngia, lo sara ye na nzoni bê. Atâa so lo yeke na ngangu ti sigigi na gigi pëpe, hio lo komanse ti fa afini tënë ti mabe ti lo na azo kue so aga ti bâ lo. Seni ti lo amû lege na lo pëpe ti gue na abungbi ti congrégation lakue, me lo yeke na ngia so aita ague asara visite na lo. Lo wara batême ti fa so lo mû tere ti lo na Nzapa awe na mbeni assemblée ti circonscription. A yeke na lango ni so la lo wara ngu 82.

Anze kete na pekoni lo kui. Kete na peko ti kuâ ti lo, a wara mbeni suma-tene so lo sû lani. Na yâ ni, lo fa vundu so mbeni mbakoro so ayeke gi lo oko ayeke na ni nga lo fa nene ti sarango nzoni na zo. Manon atene: “Suma-tene so mbi diko so andu bê ti mbi mingi nga mbi yeke na ngia so Jéhovah amû maboko na e ti sara nzoni bê na lo.”

Biani, tapande ti Jéhovah wani apusu e ti sara ye na ndoye nga na nzoni bê tongaso (aÉph. 5:1, 2). Kusala ti e ayeke lë lengo tongana e ‘wani e sara nzoni tënë ti e tongana awakua ti Nzapa na sarango nzoni na zo’.​—2 aCor. 6:4, 6.