Mo dabe ti mo na ni?

Mo diko a-article ti Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Ngbanga ti nyen ti sara ye alingbi na afango ye ti Bible?

Azo so asara ye alingbi na afango ye ti Bible ayeke na nzoni yingo-ti-hinga nga ala yeke na nzoni songo na azo ti sewa ti ala (Ps. 19:9, 12). Mingi ni, azo so asara sanka ti aye so Bible afa ayeke wara vundu.​—1/12, lembeti 8, 9.

Na lege wa Salomon ayeke mbeni gbotongo mê teti e?

Nzapa airi lani tënë nzoni na ndo ti Gbia Salomon nga lo sara kusala na lo. Ye oko, na ngoi ti komandema ti Salomon, lo gue nde na wango ti Nzapa. Lo sara mariage na molenge-wali ti Pharaon so ayeke païen, lo mû gbâ ti awali nga yeke na yeke lo zia si awali païen so ague na lo na yâ ti vorongo nzapa ti wataka. A lingbi e kpe ti maï asioni bibe yeke na yeke na yâ ti e (Deut. 7:1-4; 17:17; 1 aGbia 11:4-8).​—1/12, lembeti 12-14.

Nyen la afa so ti londo na ngoi ti akozo Chrétien ti ga na ni, a yeke wara lakue na ndo ti sese ambeni tâ Chrétien so a soro ala ti gue na yayu?

Na yâ ti parabole ti Jésus na ndo ti “ablé” nga na “asioni pere”, “pendere ngongoa ti kobe” aye ti sara tënë ti “amolenge ti royaume.” (Mat. 13:24-30, 38). Asioni pere ni ayeke maï legeoko na ablé ni juska na ngoi ti kongo lê ti kobe. Ni la, atâa so e lingbi pëpe ti hinga mbilimbili azo so ayeke na yâ ti bungbi ti ala so ablé ni aduti fä ti ala, e hinga biani so ambeni ayeke ngbâ na ndo ti sese juska na ngoi ti e.​—15/1, lembeti 7.

E lingbi ti sara tongana nyen ti hon ndo ti kota bê?

Aye so ge alingbi ti mû maboko na e: Sara ngangu ti maï ndoye nga na yengo tere ti aita, bungbi oko na azo so akpe mbeto ti Nzapa, gi ti sara aye ti nzoni nga ‘duti na ngia legeoko na azo so aduti na ngia’. (aRom. 12:15).​—15/2, lembeti 16-17.

Tongana e yeke mû wango, aye wa a yeke nzoni e girisa ni pëpe?

Gi ti hinga ye ni nzoni. Dö tere pëpe ti kiri tënë. Sara tere ti mo kete na sara ye alingbi na Bible. Tongana lege ayeke dä, sara kusala na ambeti ti e. Mû desizion na place ti azo ape.​—15/3, lembeti 7-9.

Anne, so Luc asara tënë ti lo na ngoi so a yeke fâ ngbanga ti Jésus, ayeke lani zo wa?

Na ngoi so Jésus ayeke lani na yâ ti tara, a tene so Anne ayeke lani “prêtre-mokonzi”. (Luc 3:2). Lo sara lani kua ti prêtre-mokonzi na ngu 6 wala ngu 7 tongaso juska ti si na ngu 15 tongaso. Na ngoi so a zi lo na kua ni, lo ngbâ na ngangu mingi na ndo ti Israël.​—1/4, lembeti 9.

Tongana Jésus atene lani atene “tambela na lo kilomètre use”, lo ye ti tene nyen la? (Mat. 5:41).

Na ngoi ni so azo ti Rome so akomande na ndo ti azo ti Israël alingbi ti gbu mbeni zo na ngangu ti sara mbeni kusala. So Jésus awa azo so ayeke mä lo ti tambela kilomètre use, lo ye ti fa so ahon ti sara ngonzo, a lingbi ala sara akusala so ague nde na ndia pëpe, so azo ti komande alingbi ti hunda na ala ti sara.​—1/4, lembeti 9.

A yeke batize ka aChrétien ngbanga ti nyen?

Batême amû lege na aChrétien ti duti na nzoni songo na Nzapa (1 Pi. 3:21). E yeke tene mbeni sambela na Jéhovah gi e oko, ti fa na lo so e ye ti mû tanga ti fini ti e kue ti sara gi na lo. Na peko ti sambela ni so, e yeke wara batême ti fa na lê ti azo kue so e mû tere ti e na Nzapa.​—1/4, lembeti 16, 17.

Zo wa la asara si “tongoro” ni asigigi ti fa lege na azo ti gingo nda ti aye na lege ti atongoro, zo wa?

A yeke Satan Zabolo, lo so lo yeke gi lani mingi ti fâ Jésus so ade kete. Satan amaï mvene, sarango ngangu, nga na fango zo. A yeke na lege ni so Jésus atene “lo yeke zo ti mvene na babâ ti mvene”, lo so ‘lo yeke wafango zo na ngoi so lo to nda ni’. (Jean 8:44).​—1/4, lembeti 29.