“Pardon, sara na e foto”

Josué so ayeke Béthelite na Mexique ague lani na kota bungbi ti district na gbata ti Querétaro. Na peko ti use lango ti kota bungbi ni, lo gue ti bâ yâ ti gbata ni. Javier na wali ti lo Maru so alondo na Colombie aga ti bâ ndo ahunda na Josué ti sara na ala foto. Teti so Josué na akamarade ti lo aTémoin ayü bongo nzoni nga ala yü badge ti ala ti kota bungbi ni, Javier na wali ti lo ahunda ala ti hinga wala ala londo ti mû mbeni diplôme wala ala londo na mbeni kota matanga la ala ga so. Josué atene na ala so ani londo na kota bungbi ti aTémoin ti Jéhovah nga lo tisa koli so na wali ti lo ti ga na lango ti dimanche ti kota bungbi ni.

Javier na wali ti lo abâ so ala lingbi ti gue ape ndali ti so ala yeke na nzoni bongo ti gue na mara ti ndo tongaso pëpe. Atâa so kue, Josué amû na ala iri ti lo na numéro ti téléphone ti Béthel so lo yeke dä.

Nze osio na pekoni, li ti Josué akpe na ngoi so Javier airi lo na téléphone. Javier na wali ti lo ague lani na kota bungbi ni na ala ye fadeso ti tene aTémoin ti Jéhovah ague asara vizite na ala na Mexico, gbata so ala yeke dä. Kete na pekoni ala to nda ti manda Bible nga hio na pekoni ala komanse ti gue na bungbi. Nze bale-oko na pekoni, ala ga awafango tënë. Atâa so a lingbi lani Javier na wali ti lo ague na Toronto na Canada, ala ngbâ ti maï na lege ti yingo na ala wara batême.

Na pekoni, Javier atokua lettre na Josué lo fa na lo ye so apusu lo ti yeda na tâ tënë. Lo tene: “Kozoni si e gue lani na kota bungbi ni, mbi na wali ti mbi e tene so e yeke na bezoin ti tene Nzapa afa lege na e. Lani tongana e bâ tongana nyen ala yü bongo pendere, e tene so âmanke ala londo na mbeni bungbi so ayeke tâ nde mingi. Na kota bungbi ni, fason so a mû maboko na e na ndoye ti wara ndo ti duti, ti wara aversê na yâ ti Bible nga sarango ye ti azo so aga adö bê ti e mingi. E bâ so, so e yü bongo tongana atouriste, a sara ye oko ape.”

Bâ tongana nyen atënë ti Salomon gbia ti ndara aga tâ tënë na ndo ti Josué! Salomon atene: “Na ndapre mo lu le-kobe ti mo, na lakui mo duti senge pëpe, teti mo hinga pëpe fade ye so aga nzoni, tongana a yeke so ge wala so kâ, wala ala use kue aga nzoni.” (Zo-ti. 11:6). Mo lingbi ti lu lê ti kobe na gbungo alege kue so azi ti tene na azo tënë ti mbeni kota bungbi so aga nduru wala mbeni diskur so a ga nduru ti mû ni? Jéhovah alingbi ti sara kusala na mo ti gboto na mbage ti lo azo so nzara ti tene Nzapa afa lege na ala asara ala tongana nzara ti kobe na ti ngu, tongana ti so asara lani Javier na Maru.​—És. 55:1.

[Foto na lembeti 32]

Ti londo na mbage ti wali ti gue na mbage ti koli: Alejandro Voeguelin, Maru Pineda, Alejandro Pineda, Javier Pineda, nga na Josué Ramírez ti Béthel ti Mexique