Sango na ndo ti mbaï ti bungbi ti e

‘A sara si azo ahinga mbi hio’

Na ngoi so Charlotte White mbeni wafango tënë ti ngoi kue asi lani na Louisville, Kentucky, na Amerika, lo yeke na mbeni valise so a zia ni na ndo ti aroue si lo yeke pusu ni. Ye so asara si azo mingi ahinga lo hio.

Na ngu 1908, kite ayeke pëpe so ita-wali White agboto lani lê ti azo ti gbata ni na lege ti valise so ândö aita ayeke zia buku L’Aurore du Millénium dä so a yeke lani mbeni fini ye. Lo tene: “A sara si azo ayeke sara gi tënë ni nga a sara si azo ahinga hio so mbi yeke mbeni fini zo na yâ ti kodoro ni.”

A-Wamandango Bible, so na pekoni a iri ala aTémoin ti Jéhovah, abâ so a lingbi ala fa na azo atâ tënë so ala hinga ni grâce na Bible so ala manda ni nzoni. Mingi ti ala amanda Bible na lege ti molongo ti abuku L’Aurore du Millénium (so na pekoni a iri nga ni Étude des Écritures). A-Chrétien so ayeda lani na bê ti ala kue ti sara ayongoro voyage nga ti tambela na yâ ti agbata nga na akete kodoro ti kangbi abuku so na ambeni zo so aye mingi ti diko mbeti.

Na ngu 1908, ita-wali White na ambeni wafango tënë ti Royaume so ayapu na kua ni akangbi lani avolume relié omene ti buku L’Aurore du Millénium teti Dollar $1.65 ti Amerika. Ahon ti zia buku ni so na azo ni na lê ni lê ni, ala yeke mû acommande ti azo ni na ala yeke kiri na mbeni lango nde na pekoni, mingi ni na lango so azo ni ayeke wara nginza ti kua ti ala, ti mû na ala abuku ni teti mbeni kete nginza. Mbeni zo so aye tënë ti kua ti e pëpe adema lani tere ndali ti so nginza so azo ayeke mû ti wara na abuku ni so ayeke kete mingi.

Malinda Keefer adabe ti lo so na yâ ti mbeni yenga oko, lo mû acommande ti abuku ngbangbo use ti si na ngbangbo ota. Me so azo mingi asara nzara ti buku L’Aurore du Millénium apusu e ti gi bê ti e. Gi omene volume ni oko ayeke na alembeti 740. Aita so ayeke sara kua na ndokua ti The Watch Tower abâ so “abuku bale-oku ane kilo 18,” ye so asara si mingi ni “a yeke ngangu mingi” na aita-wali ti kangbi abuku so.

Ti leke kpale ti kangbingo buku so, ita James Cole aleke ambeni roue use so lo zia valise ni na ndo ni na lo bloqué ni na tere ti aroue ni na lege ti akete wen. Teti so a hunda na lo mbeni pëpe ti yô na ndo ti go ti lo anengo carton na gbâ ti abuku na yâ ni, ita so aleke valise so atene: “Mbi yeke yô anengo buku na ndo ti go ti mbi mbeni pëpe.” Lo sigigi na fini gbakuru ni so na ngoi ti kota bungbi ti aWamandango Bible so a sara ni na Cincinnati, Ohio na ngu 1908; ye so amû ngia na ala mingi. Na ndo ti abouton ti yanga ti valise ni a sû iri so a mû na valise ni dä (Dawn-Mobile), ndali ti so ye so a yeke zia ka na yâ ni ayeke arelié ti buku L’Aurore du Millénium. Tongana zo asara kua na valise so lakue, a yeke duti ngangu mbeni pëpe na lo ti yô gbâ ti abuku na yâ ni nga ti pusu ni maboko oko. Zo alingbi ti zia aye na yâ ti valise ni alingbi na ngangu ti lo, nga aroue ni alingbi ti hon na ndo ti abengba lege nga na alege ti goudron. Tongana mbeni zo ahunzi fango tënë, lo lingbi ti plié aroue ni na tere ti valise ni tongaso si lo yô ni na ngoi so lo yeke kiri na yanga-da na gere wala na bus.

Aita-wali so ayeke na yâ ti kua ti ngoi kue alingbi ti wara valise ni so senge senge. Me ngere ni ayeke $2.50 (U.S.). Ita-wali Keefer, so foto ti lo ayeke na lembeti so, ahinga ti sara kua nzoni na valise so a sara si lo lingbi ti zia abuku asi yâ ni lo pusu ni maboko oko nga lo yô mbeni bozo so abuku asi yâ ni na mbage ti maboko ti lo. Na yâ ti mbeni gbata so a yeke gi amosoro ti gbe ti sese dä na Pennsylvanie na Amerika azo mingi asara nzara ti tënë ni. Fani mingi na yâ ti lango oko, lo yeke yô abuku na yâ ti valise ni so fani ota wala osio ti gue ti kangbi ni.

A yeke na ngu 1987 la mbeni zo so ayeke kpe na lapara asigigi na valise so aroue ayeke na gbe ni so e yeke bâ ni mingi laso na yâ ti a-aéroport wala na ndo ti alege ti agbata so azo ayeke dä mingi. Me ândö na yâ ti angu 1908 ti ga na ni, aWamandango Bible so ayapu na kusala ni aye mingi so azo ayeke hinga ala hio na ngoi so ala yeke pusu avalise so ala zia abuku L’Aurore du Millénium na yâ ni, ndali ti so a gboto lê ti azo ni na ndo ti kusala ti ala.

[Kete tënë na lembeti 32]

Fani mingi na yâ ti lango oko, keefer ayeke yô abuku na yâ ti valise so fani ota wala osio ti gue ti kangbi ni

[Kete tënë na lembeti 32]

Valise so aleke kpale ti kangbingo abuku L’Aurore du Millénium