Tâ tënë alingbi ti changé fini ti mo
PEUT-ÊTRE mo mä wala a fa na mo awe mbeni oko ti amvene so azo atene na ndo ti Nzapa so a zi ndani na yâ ti a-article so. Ye oko, mo lingbi ti gi bê ti mo na ndo ti changengo aye so mo mä na bê na ni, mingi ni tongana mo mä na bê na mbeni oko ti amvene so teti ngu mingi.
A yeke na lege ni ti tene mo gi bê ti mo. Ambeni bungbi ti vorongo Nzapa aye pëpe ti tene azo ahaka afango ye ti ala na ye so Bible afa. Ti ambeni, ti fa so afango ye ti ala ti wataka so ayeke na lege ni, ala yeke tene so Bible ayeke mbeni mbeti so ayeke ngangu mingi, so zo kue la alingbi ti gbu ndani pëpe. Ye oko, mingi ti adisciple ti Jésus ayeke lani asenge zo, azo so amanda mbeti ayo pëpe nga aye so Jésus afa, ala yeke gbu ndani hio.—Kusala 4:13.
Mo lingbi ti pensé so tongana mo gi ti bâ wala aye so mo mä na bê na ni ayeke tâ tënë wala pëpe, a fa so mabe ti mo atï awe. Me, a yeke na lege ni ti tene bê ti Nzapa ason tongana mo gi na yâ ti Bible, Mbeti ti lo so lo mû na azo, ti hinga ye so lo ku na mbage ti mo? Atënë ti lo so ayeke na yâ ti Bible awa mo ti gi aye ni mo wani na yâ ti Bible ni, a tene: “Si ala wani alingbi ti hinga ye so bê ti Nzapa aye, so ayeke nzoni, so anzere nga so alingbi kue.”—aRomain 12:2.
Ti hinga tâ tënë na ndo ti Nzapa andu aye mingi ahon gi senge hingango ye, a lingbi ti sara si fini ti mo aga nzoni ahon ti kozo (Jean 8:32). Deanne, so a sara tënë ti lo na yâ ti kozo molongo ti a-article so, amä na bê ngangu fadeso na Mbeti ti Nzapa. Lo tene: “Kozoni si mbi manda Bible, mbi pensé lâ oko pëpe so atënë ti yâ ni ayeke polele. Ti fadeso mbi hinga Jéhovah gi pëpe tongana mbeni Nzapa so ayeke dä, me tongana Babâ ti mbi ti yayu so aye mbi mingi. Mbi yeke na anzoni ye ti sara na yâ ti gigi ti mbi.”
Peut-être mo manda Bible kozo, me mo bâ so mo wara ye ti nzoni dä pëpe. Ti gi ti gbu nda ti Bible na ngoi so a fa na mo amvene na ndo ti Nzapa ayeke mo bâ mo tene mo yeke gue na mbeni ndo so ade mo si dä lâ oko pëpe nga a fa na mo lege ni nzoni pëpe. Peut-être mo to nda ni nzoni, me na pekoni vundu ahon ndo ti mo tongana mo girisa lege ni. Tongaso, tongana mo ye ti si na ndo so mo ye ti gue dä, mû nzoni lege ni nga hunda ti tene a fa na mo mbilimbili lege so ague ti si na ndo ni. Mo ye ti hinga nzoni lege so ague na Nzapa nga ti hinga tâ tënë na ndo ti lo?
Mo ye ti hinga tâ tënë na ndo ti Nzapa? E tisa mo ti gi ti wara tere na aTémoin ti Jéhovah ti ndo so mo yeke dä wala ti sû mbeti na adresse so alingbi na mo so ayeke na lembeti 4 ti Tour ti Ba Ndo so ti tene a manda Bible na mo senge senge.
[Kete tënë na lembeti 9]
“Si ala wani alingbi ti hinga ye so bê ti Nzapa aye, so ayeke nzoni, so anzere nga so alingbi kue.”—AROMAIN 12:2