3 Nzapa ayeke zo ti futango kula: A yeke tâ tënë la?

Peut-être mo mä a tene: “Nzapa ayeke diko asiokpari kue so azo asara, na lo yeke zö ala teti lakue lakue na yâ ti enfer.”

“Nzapa ayeke mû aye tongana yengingo ti sese wala mbeni kota pupu ti se na azo so asara ye ti sioni.”

Ye so Bible afa: Na 2 Pierre 3:9, a tene so Jéhovah ‘aye si zo oko akui pëpe, me lo ye si azo kue achangé bê ti ala.’ Ahon ti tene Jéhovah abâ gi afaute ti e, lo yeke bâ aye ti nzoni so e sara. “Lê ti L’Éternel akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.”​—2 Chronique 16:9.

Bible afa pëpe tënë ti enfer ti wâ. Tënë ti gbingo zo na yâ ti wâ teti lakue lakue ayeke mbeni ye so ayeke sioni mingi na lê ti Nzapa. Sengo ndo so ayeke kota ahon atanga ni kue so Nzapa alingbi ti se na mbeni zo ayeke gi ti zi fini ti zo ni (Jérémie 7:31; aRomain 6:7). Aye tongana yengingo ti sese wala mbeni kota pupu, so ayeke sara sioni na azo kue sân ti zia kangbi na popo ti ala, ayeke pëpe akusala ti Nzapa, me a yeke aye so zo ayeke ku tere ti lo na ni pëpe so alingbi ti si na zo kue.​—Zo-ti-fa-tene 9:11.

Ti hinga tâ tënë ayeke mû maboko na mo: E lingbi ti ga nduru na Nzapa tongana e hinga so lo “ye ti pardone” zo nga lo yeke nduru ti fâ gi ngbanga na ndo ti azo pëpe (Psaume 86:5). A lingbi e sara na Nzapa pëpe gi ndali ti mbeni ye ti sioni so e sara wala ndali ti so e kpe ti tene lo se e. Me e lingbi ti zia si ndoye so e yeke na ni na mbage ti Jéhovah la apusu e ti duti na mabe na lo. Ndoye so ayeke pusu e ti sara kue ti nzere na lê ti lo.​—Matthieu 22:36-38; 1 Jean 5:3.

Atâa so Nzapa aye ti tene azo kue akiri asara aye ti nzoni, lo hinga so azo mingi ayeke sara ande ni lâ oko pëpe. Tongana lo sara ye oko pëpe na azo ti sioni so angbâ gi ti sara aye ti sioni, lo hon tere pëpe na mbeni mokonzi so asigigi na andia me so aye pëpe ti tene azo asara ye alingbi na andia ni, lo yeke zia si aye ti kirikiri nga na pasi angbâ gi lakue lakue tongaso (Zo-ti-fa-tene 8:11). Tongana e hinga so Nzapa ayeke zia lege na aye ti sioni ti ngbâ lakue lakue pëpe, a sara si e yeke na mbeni kpengba beku teti kekereke. Nzapa amû zendo ti zi azo so angbâ gi ti sara aye ti sioni, tongaso si “azo so ayeke na tâ be-ti-molenge” aduti na fini lakue lakue na ndo ti sese tongana ti so lo leke na tongo nda ni.​—Psaume 37:10, 11, 29.a

[Kete tënë na gbe ni]

[Kete tënë na lembeti 6]

Nzapa aye si e voro lo ndali ti so e kpe ti tene lo se e?

[Lingu ti foto na lembeti 6]

Engravings by Doré