Mbeni zo ayeke na peko ti aye ti sioni kue?

NA PEKONI so mbeni turugu ti kota kamba so ayeke bâ ndo na ndo ti aturugu ti Bendo ti Gigi abâ aye ti sioni so asi na azo na kodoro ti Rwanda na ngu 1994, lo tene so a yeke mo bâ mo tene ni bâ Zabolo. Kota zo ti place ti kua ti lo amû yanga ti tene a kaï bira ni so pëpe. Mbeni zo nde so asara tënë na ndo ti sana so a sara na azo na ngoi ni so atene: “Tongana mbeni zo angbâ ti dë kite atene Satan ayeke dä pëpe, zia lo ga lo wara mbi na Rwanda na yanga ti adü ti kuâ so a tuku gbâ ti akuâ na yâ ni.” Zabolo la ayeke sara aye ti sioni so?

Azo mingi apensé pëpe so a yeke mbeni zo ti yingo la ayeke na gunda ti aye ti sioni nga na sana so a sara na azo senge senge. Azo mingi apensé so aye tongaso ayeke dä ndali ti so a dü e dungo na bibe ti sarango ye ti sioni. Ambeni afa so groupe ti ambeni zo so ayeke na mosoro nga na ngangu mingi na so ayeke na ndo ti sese kue la ayeke pusu azo teti angu mingi ti sara ye so bê ti ala aye tongaso si ala komande dunia. Nga, ambeni zo atene a yeke angorogbia nga na azo so ayeke komande la ayeke na gunda ti aye ti kirikiri nga na apasi kue so ala yeke bâ.

Tënë wa la mo mä na bê na ni? Ngbanga ti nyen aye ti sioni, asana so a sara na azo nga na apasi amû ndo na yâ ti dunia na angbâ gi ti gue na li ni atâa so azo ayeke sara ngangu ti kanga lege na ni? Ngbanga ti nyen na bango ni mo bâ mo tene azo aye gi ti sara aye so ayeke gue na ala na kuâ nga ala sara sanka ti agbotongo mê so a yeke mû lakue? Mbeni zo ayeke na peko ti aye ti sioni so kue? Zo wa biani la akomande dunia? Kiringo tënë ni alingbi ti dö bê ti mo.