Kota yere ayeke nyen?

ZO SO ayeke na yâ ti kota yere dutingo ti lo ayeke nzoni pëpe. Lo yeke te kobe nzoni pëpe, lo yeke nyon nzoni ngu pëpe, nga lo yeke na pétrole pëpe. Lo yeke na nzoni da ti lango pëpe, lo yeke na moyen ti bâ lege ti seni ti lo pëpe wala ti manda mbeti pëpe. Azo ngbundangbu oko ayeke na yâ ti kota yere, wungo so aga nduru na wungo ti azo kue ti Afrika. Ye oko, mingi ti azo ti Poto ti Do nga na ti Amerika ti Banga abâ lâ oko pëpe mbeni zo so ayeke na yâ ti kota yere. Zia e mä tënë so ambeni zo so ayeke na yâ ti kota yere atene.

Mbarushimana so ayeke na kodoro ti Rwanda ayeke na wali na amolenge omene, me oko akui na kobela ti palu. Lo tene: “Babâ ti mbi akangbi yâ ti terrain na popo ti e omene. Teti so ti mbi terrain ni ayeke kete mingi, mbi na sewa ti mbi e gue ti e na kota gbata. Mbi na wali ti mbi e yeke sara kua ti rongo atênë nga na ti fungo mbutu. Fenêtre ayeke na da ti e pëpe. E yeke tö ngu na dungu so ayeke na ndo ti lapolice. E yeke te ka kobe gi fani oko na yâ ti lango oko. Me tongana e wara kua pëpe, e yeke te kobe na yâ ti lango ni so pëpe. Tongana kobe ti tengo ni ayeke dä pëpe, mbi yeke duti na yanga-da pëpe ndali ti so mbi lingbi pëpe ti kanga bê ti mä amolenge na ngoi so ala yeke toto nzara.”

Victor na Carmen so ayeke azo ti fungo poro ayeke na amolenge oku. Ala lango na mbeni kete kodoro ti Bolivie. Mbeni gbagbara da so a sara ni na senge brique na so li ni ayuru nga so courant ayeke dä pëpe la ala loué mbeni chambre ni oko. Teti so wungo ti a-élève ahon ndo ni na yâ ti ekole ti ndo ni na abanc ayeke mingi pëpe, a lingbi Victor aleke banc na molenge ti lo ti wali si lo lingbi ti gue na ekole. A lingbi Victor na wali ti lo atambela akilomètre bale-oko ti gi keke ti wâ ti tö na kobe nga ti kporo na ngu ti nyongo. Carmen atene: “E yeke na kabine pëpe. Ni la a lingbi e gue na yanga ti ngu ti sara kabine, na oko ngu so la azo ayeke sukula tere ti ala na yâ ni nga a yeke tuku azende dä. Fani mingi amolenge ayeke tï kobela.”

Francisco na Ilídia alango na mbeni kete kodoro na Mozambique. Ala yeke na amolenge oku, me oko akui na kobela ti palu na peko ti so azo ti hôpital ake ti kaï kobela ti lo. Francisco na Ilídia afâ yaka ti loso nga na ti babolo na ndo ti kete terrain ti ala ti tene ala wara kobe teti nze ota. Francisco atene: “Na ambeni ngoi e wara aye ti yaka ni mingi pëpe ndali ti so ngu apika nzoni pëpe wala azo anzi aye ti yaka ni. Tongaso, mbi yeke wara kete nginza na lege ti abambu ti lekengo na da so mbi fâ mbi kä. E yeke tambela nga angbonga use ti gue na yâ ti ngonda ti fâ akeke ti wâ. Mbi na wali ti mbi, zo oko oko ayô gbâ ti keke ni na li ti lo ti ga na ni na yanga-da. E kä mbage ni na e zia mbage ni ti tö na kobe teti yenga oko.”

Tongana a mû azo mbasambala na yâ ti dunia so, oko na popo ti ala dutingo ti lo ayeke tongana ti Mbarushimana, ti Victor, nga na ti Francisco, me na oko ngoi ni azo kutu mingi ayeke na gbâ ti mosoro. Azo mingi abâ so ye so ayeke na lege ni pëpe. Ambeni atara ti sara ambeni ye ndali ni. A-article ti peko ayeke sara tënë na ndo ti ngangu so azo so asara ti leke kpale so nga a yeke fa beku so ala yeke na ni.

[Foto na alembeti 2, 3]

Carmen na ambeni molenge ti lo use ayeke tö ngu