Azo ti yingo ayeke azo wa?

Na Poto, mbeni mbakoro wali na chapelet na maboko alï na yâ ti eglize na lo kuku na sese na devant ti statue ti Marie ti sambela lo. Na Afrika, mbeni sewa atuku mbeni ngangu sämba na ndo ti sende ti kuâ ti mbeni fami so ala ne lo mingi. Na Amerika, mbeni maseka-koli amû jeûne na lo yeke gbu li ti lo teti so lo ye ti sara lisoro na mbeni ye so lo bâ ni tongana ange ti batango lo. Na Asie, mbeni prêtre ayeke gbi ambeni ye so a sara ni na kugbe-mbeti so ayeke na nzoroko nde nde ti mû tongana sandaga na ayingo ti akotara.

MBENI ye ayeke dä so azo so kue amä na bê na ni. A yeke nyen? Ala kue amä na bê so ambeni zo ayeke na ndo ti ayingo na so zo alingbi ti ga nduru na ala nga ala lingbi ti sara ngangu mingi na ndo ti fini ti azo. Biani, tënë so ayeke fini ye pëpe nga adö bê ti e pëpe. Ye so adö bê ayeke so afango ye na ndo ti azo so ayeke na ndo ti ayingo ayeke mingi nga afango ye so kue amä tere pëpe.

Amusulman ayeke voro Nzapa oko so ayeke Allah.a Azo so atene ala yeke aChrétien amä na bê na tënë ti Nzapa Babâ, Nzapa Molenge nga na Nzapa Yingo vulu. Ahindou amä na bê so anzapa na anzapa-wali ayeke dä so wungo ti ala ahon saki oko. Ambeni zo atene so ayingo ayeke na yâ ti ambeni nyama, akeke, atênë nga na angu. Na ndo ni, gbâ ti abuku, afilm nga na alimon so a yeke fa na télé na so asara tënë na ndo ti a-ange, asioni yingo, atoro, akalakungba, anzapa nga na anzapa-wali asara ngangu mingi na ndo ti ambeni zo.

Legeoko tongana ti so afango ye ayeke mingi na ndo ti anzapa na so afango ye so kue amä tere pëpe, legeoko nga lege ti sarango lisoro na ala ayeke mingi na alege ni so kue amä nga tere pëpe. Tâ tënë ni ayeke so, e lingbi pëpe ti tene so alege ni so kue ayeke nzoni. Gbu li kete: Kozoni si e iri ndo na téléphone, a lingbi e hinga zo so e ye ti iri lo, e hinga nga so zo ni ayeke dä biani na lo yeke yeda ti mä e. Ti gi ti iri mbeni zo so ayeke na fini lâ oko pëpe ayeke ga na mo ye oko pëpe. Ye so ayeke sioni mingi ayeke so, ti sara lisoro na mbeni zo so atene ni yeke zo so mo ye ti sara tënë na lo alingbi ti duti sioni.

Tongaso, azo wa biani la ayeke na ndo ti ayingo? Bible amû kiringo tënë ni, a fa nga zo so a lingbi e sara lisoro na lo nga ye so e lingbi ti wara na pekoni. E wa mo ti diko atënë so ayeke ga na peko. Bê ti mo alingbi ti dö tongana mo bâ aye so Bible afa.

[Kete tënë na gbe ni]