Ti hinga iri ti Nzapa aye ti tene nyen?
NDA ti iri ti mo ayeke dä? Na ambeni ndo, mingi ni tongana a zia iri na ndo ti mbeni molenge, nda ti iri ni ayeke dä. Iri ni alingbi ti gue oko na aye so babâ na mama ti lo amä na bê na ni, aye so ayeke kota ye na lê ti ala wala aye so ala ku ti tene molenge ni asara na yâ ti gigi ti lo.
Mungo na zo iri so ndani ayeke dä ayeke fini ye pëpe. Na ngoi ti awakua ti Nzapa giriri, mingi ti airi so a mû na azo, ndani ayeke dä. Iri ti mbeni zo alingbi ti fa ye so a ku ti tene lo sara na yâ ti fini ti lo. Na tapande, na ngoi so Jéhovah afa na David ye so molenge ti lo Salomon ayeke sara ande na yâ ti gigi ti lo, lo tene: “Fade iri ti lo ayeke Salomon [alondo na mbeni mbupa so ndani ayeke “siriri”]; na lâ ti lo kue, fade Mbi mû siriri na wungo tere na azo ti Israël.”—1 Chronique 22:9.
Na ambeni ngoi, Jéhovah amû fini iri na azo so lo mû na ala fini kua ti sarango ni. Wali ti Abraham so ayeke lani ngombo awara iri ti Sara, so ndani aye ti tene “Molenge-wali ti gbia.” Ngbanga ti nyen? Jéhovah afa ndani lo tene: “Fade Mbi iri tënë nzoni na ndo lo, Mbi mû molenge-koli na mo na lege ti lo nga; biani, fade Mbi iri tënë nzoni na ndo lo, na lo ga mama ti amara; fade agbia ti amara asigigi na yâ lo.” (Genèse 17:16). A yeke polele so ti hinga ngbanga ti nyen Sara awara fini iri a hunda nga ti hinga fini kusala so a mû na lo.
Ka ti iri Jéhovah so ayeke kota ahon tanga ti airi kue, a yeke tongana nyen? Ndani aye ti tene nyen? Na ngoi so Moïse ahunda Nzapa na ndo ti iri ti lo, Jéhovah akiri tënë lo tene: “Fade Mbi yeke ga ye so fade mbi yeke ga.” (Exode 3:14, FD). Iri ti Jéhovah afa so lo yeke mbeni Nzapa so akusala ti lo ayeke mingi. Zia e mû mbeni tapande. Lâ oko oko, mbeni mama ayeke sara akua mingi ndali ti amolenge ti lo. Lo lingbi ti sara kusala ti zo ti bango lege ti azo ti kobela, zo ti tongo kobe wala wafango ye. Lo yeke sara ye alingbi na aye so asi. Jéhovah nga kue ayeke sara tongaso, me lo yeke sara ni na mbeni lege so ayeke kota mingi. Ti sara si nzoni ye so lo leke ti sara teti azo aga tâ tënë, lo lingbi ti ga ye kue so anzere na lo ti ga ni ti sara ye kue so a hunda ti tene lo sara. Ti hinga iri ti Jéhovah aye nga ti tene ti hinga gbâ ti akusala ti lo nga ti bâ ni na nene ni.
Ye ti mawa ni ayeke so, azo so ahinga pëpe iri ti Nzapa ahinga nga pëpe apendere sarango ye ti tere ti lo. Ye oko, tongana mo manda Bible, mo yeke hinga akusala ti Jéhovah. Bâ gi ambeni kusala oko oko so lo yeke sara. Lo yeke mbeni Zo ti mungo wango so ayeke na ndara, lo yeke ngangu Zo ti songo azo nga lo yeke mû ye mingi na zo. Biani, nda ti iri ti Jéhovah alï mingi, a yeke ye ti dongo bê.
Ye oko, ti gi ti hinga Nzapa nzoni ayeke lakue kete ye pëpe. Article ti peko ayeke fa ngbanga ti nyen a yeke tongaso.