Ga nduru na Nzapa

“Mo yeke duti be-ta-zo”

2 SAMUEL 22:26, FD

TONGANA mo zia bê ti mo kue na mbeni zo si na nda ni lo yeke be-ta-zo na mo pëpe, ye so ayeke mû vundu wala ayeke son bê ti mo mingi ahon tanga ti aye kue. Na yâ ti dunia so azo ayeke be-ta-zo pëpe, mara ti sarango ye tongaso ayeke si ka mingi (2 Timothée 3:1-5). Mbeni zo ayeke dä so e lingbi ti zia bê ti e kue na lo na so ayeke ngbâ be-ta-zo na e? Zia e bâ atënë so David gbia ti Israël ti giriri atene.

Na yâ ti fini ti David, azo aduti be-ta-zo pëpe na lo na mbeni lege so ayeke tâ sioni mingi. Saül, kozo gbia ti Israël, asara kota bê na tere ti David na lo yeke gi ti sara sioni na lo, ye so apusu David ti kpe kodoro ni. Na yâ ti sewa ti David wani, wali ti lo Mical ayeke be-ta-zo na lo pëpe, me ahon so Mical “ake lo na bê ti lo.” (2 Samuel 6:16). Ahitophel, wawango so David azia bê ti lo kue na ndo ti lo akä lo na lo mû peko ti azo so alondo ti sara bira na David. Zo wa la amû li ni na yâ ti gbengo lingo so? A yeke mbeni zo nde pëpe, me Absalom tâ molenge ti David! Na ngoi so aye so asi na David na peko ti tere, bê ti lo anze na lo tene na nda ni so mbeni zo so ayeke ngbâ be-ta-zo lakue ayeke dä pëpe?

Kiringo tënë ni ayeke na yâ ti atënë ti David so e wara na 2 Samuel 22:26. David, mbeni koli so ayeke na kpengba mabe, atene na yâ ti bia na Jéhovah lo tene: “Mo yeke duti be-ta-zo na zo so ayeke be-ta-zo.” (FD). David ahinga na bê ti lo kue so atâa ye wa so azo asara ti zia vundu na bê ti lo, Jéhovah ayeke ngbâ lakue be-ta-zo na lo.

Zia e gi ti gbu nda ti atënë ti David so nzoni. Tënë ti Hébreu so a kiri pekoni na “duti be-ta-zo” a lingbi nga ti kiri pekoni na ‘sarango nzobe’. Ndoye la ayeke pusu zo ti duti be-ta-zo. Na ndoye, Jéhovah amû tere ti lo mingi na azo so ayeke be-ta-zo na lo.a

Bâ nga so dutingo be-ta-zo ayeke gi pëpe mbeni tënë so ayeke na yâ ti bê ti zo, me a yeke bâ ni na yâ ti sarango ye ti zo. Asarango ye ti Jéhovah afa so lo yeke be-ta-zo, na David abâ ni na lege ti aye so asi na lo. Na ngoi so aye aga ngangu mingi na David, Jéhovah amû maboko na lo, lo bata lo nga lo fa lege na lo ndali ti so lo yeke mbeni gbia so ayeke be-ta-zo. David akiri singila na lo fa so Jéhovah la azi lo “na tïtî awato ti lo kue”.​—2 Samuel 22:1.

Atënë ti David so aye ti tene nyen teti e? Jéhovah achangé pëpe (Jacques 1:17). Lo yeke lakue be-ta-zo na aye so lo fa, nga lo yeke sara ye lakue alingbi na azendo so lo mû. Na yâ ti mbeni Psaume nde, David atene: ‘L’Éternel azia azo ti Lo ti nzobe pëpe.’​—Psaume 37:28.

Dutingo be-ta-zo ti e ayeke kota ye mingi na lê ti Jéhovah. So e yeke be-ta-zo na lo na lege so e yeke mä yanga ti lo lakue, lo bâ ni na nene ni nga lo wa e ti mû tapande ti lo ti duti be-ta-zo na amba ti e (aÉphésien 4:24; 5:1). Tongana e sara tongaso, e lingbi ti hinga na bê ti e kue so lo yeke zia e lâ oko pëpe. Atâa ye wa so azo asara ti zia vundu na bê ti e, e lingbi ti zia bê ti e kue na Jéhovah ti mû maboko na e ti hon ndo ti akpale so e yeke tingbi na ni. Bê ti mo apusu mo ti ga nduru na Jéhovah ‘Lo so ayeke be-ta-zo’?​—Apocalypse 16:5.

[Kete tënë na gbe ni]