Amvene ni adü gi na ndo ti tere

“ALA SARA hange”! So ayeke tënë so bazengele Paul asû na aChrétien na ngu 60 tongaso. Lo ye ala sara hange ngbanga ti nyen? “Si mbeni zo agbu ala na kûkû pëpe na lege ti senda-ndara na senge tënë ti handa so alondo na ngobo ti azo.”​—aColossien 2:8.

Atâa so Paul ahunda na aChrétien ti sara hange, na ngu 150 ti ga na ni, ambeni Chrétien ato nda ti fa atënë ti mabe ti ala na lege ti atënë ti awasenda-ndara ti giriri. Ngbanga ti nyen? Ala ye si azo ti Kodoro-togbia ti Rome so ahinga mbeti mingi aye afango ye ti ala na tongaso ala wara gbâ ti awamabe.

Justin Martyr so ayeke mbeni oko ti aChrétien so iri ti ala awu mingi amä na bê so Wayanga ti Nzapa afa tere ti lo na azo ti senda-ndara ti Grec ngu mingi kozoni si Jésus aga na sese. Ti Justin na ambeni wafango ye ni so bibe ti ala ague oko na ti lo, yorongo atënë ti senda-ndara ti azo nga na ambaï so ayeke tâ tënë pëpe na yâ ti afango ye ti aChrétien ayeke sara si azo kue ayeda na nzapa ni so.

Mara ti nzapa ti aChrétien so Justin Martyr asigigi na ni awara lani azo mingi. Ye oko, yengo dä na ambaï so ayeke tâ tënë pëpe akiri adü ambeni na ndo ni nga asara si mingi ti atënë so azo mingi laso abâ ni tongana fango ye ti aChrétien abâ gigi. Ti hinga so atënë so ayeke biani amvene, bâ aye so ambeni mbeti atene, na haka ni na ye so Bible afa.

[Lingu ti afoto na lembeti 3]

Zabolo: Barrators​—Giampolo/​The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence