Lango wa la mo soro ti manda na Bible?
NA NGU so ahon, Bebungbi agbian yâ ti kapa ti abungbi ti congrégation so amû lege na asewa ti wara ngoi mingi ti manda Bible nga ti sara lisoro. Tongana mo yeke mokonzi ti sewa, sara kue ti tene mandango ye ni andu bezoin ti azo ti sewa ti mo, na manda Bible lakue na wali ti mo nga na amolenge ti mo. Azo so asara mariage awe so ayeke na molenge pëpe alingbi ti mû ngoi so ti manda ye legeoko. Akumbamba so ayeke na mbeni zo na gbe ti ala pëpe alingbi ti sara kusala nzoni na ngoi so ti manda na Bible ala wani.
Azo mingi afa tënë ti bê ti ala teti gbiango ye so andu Mandango tënë ti Nzapa na sewa na lakui. Na tapande Kevin, so ayeke mbeni ancien, atene: “Ti tene e tene ‘singila’ a lingbi pëpe ti fa ngia so e yeke na ni na yâ ti congrégation. E so e yeke a-ancien, e sara lisoro ti bâ tongana nyen e yeke sara kusala na bï so Bebungbi ahunda ti tene e zia ni nde: ti manda ye na sewa ti e.”
Jodi, so koli ti lo ayeke mbeni ancien, atene: “E yeke na amolenge-wali ota so oko ayeke na ngu 15, mbeni ayeke na ngu 11 na tanga ni ayeke na ngu 2. E gue na mbeni congrégation ti yanga ti awambongi aninga pëpe. A hunda ngoi mingi nga a hunda ti sara ngangu ti leke abungbi kue. Fadeso, gbiango ye so amû lege na e ti wara mbeni ngoi na lakui na ndo ti ngoi so e yeke na ni ti zia lê ti e gi na ndo ti mandango ye na sewa.”
Jean na wali ti lo JoAnn so ayeke apionnier atene: “Mingi ni e yeke manke mandango Bible ti e na sewa teti a lingbi e zia ni na popo ti akusala nde nde ti congrégation. Fini gbiango ye so ayeke mbeni matabisi so alondo na Jéhovah ti mû ngangu na e, tongana e sara kusala na ngoi so tongana ti so a hunda.”
Tony, mbeni ita so ayeke kumbamba so ngu ti lo ayeke 25, amû lango ti mardi na lakui teti mandango ye ti lo wani. Lo mû ambeni lango nde ti yenga ni ti leke na abungbi ti congrégation. Me Tony atene: “Mbi yeke ku lango ti mardi kungo.” Ngbanga ti nyen? “Lakui so ayeke ngoi so mbi zia nde teti mbi na Jéhovah.” Tony atene: “Mbi mû ngbonga use ti manda aye so akpengba songo ti mbi na Jéhovah. Warango ngoi ti manda ye amû lege na mbi ti gbu li na ndo ti aversê ti Bible so mbi diko. Ye so asara si wango ti Jéhovah alï yâ ti bê ti mbi mingi ahon ti kozo.” Lo fa mbeni tapande: “Na yâ ti buku Étude perspicace, mbi diko tënë na ndo ti songo ti kamarade so ayeke na popo ti David na Jonathan. Mbi manda ye mingi na mbage ti Jonathan so agi ye teti lo wani pëpe. Tapande ti lo amû maboko na mbi ti hinga nzoni mingi ye so aye ti tene dutingo tâ kamarade. Biani mbi yeke ku mardi na lakui kungo ti hinga mara ti apendere tënë tongaso mingi mingi.”
Kite ayeke pëpe so fade awakua ti Jéhovah kue ayeke wara ye ti nzoni mingi na sarango kua nzoni na ngoi so a zia fadeso na ndo ti ngoi so ala yeke na ni ti manda Bible nga ti manda tënë ti Nzapa na sewa nzoni.