Ngbanga ti nyen li ti azo akpe kirikiri na ndo ti tënë ti yingo vulu?
YINGO vulu ayeke nyen? A kpa hundango tënë so akpengba pëpe, me ti kiri tënë na ni hio a yeke ngangu. Tobua Benoît XVI atene na gbâ ti azo so abungbi na kodoro ti Australie: “A yeke ngangu mingi na zo ti hinga tënë nzoni na ndo ti Yingo.”
Tongana a hunda azo a tene: Yingo vulu ayeke nyen?, kite ayeke pëpe so azo ayeke kiri tënë nde nde na ndo ni. Ambeni mara ti kiringo tënë ni ayeke so:
• Yingo vulu ayeke mbeni tâ zo so ayeke na yâ ti adisciple ti Christ.
• Yingo vulu ayeke mbeni lege ti fa so Nzapa ayeke na yâ ti dunia.
• Yingo vulu ayeke ota zo na yâ ti tënë ti Nzapa Babâ, Nzapa Molenge, na Nzapa Yingo vulu.
Ngbanga ti nyen li ti azo akpe kirikiri tongaso? A yeke ngbene ye na ngu 300 ti si na ngu 400, si ambeni wandara ti tënë ti nzapa atene so yingo vulu ayeke mbeni zo so alingbi tere na Nzapa. Ye oko, bibe so alondo na yâ ti Mbeti ti Nzapa pëpe wala na mbage ti akozo disciple ti Christ pëpe. Mbeni bakari (The New Catholic Encyclopedia) atene: “Testament ti Giriri afa polele so yingo ti Nzapa ayeke mbeni zo pëpe . . . Yingo ti Nzapa ayeke gi ngangu ti Nzapa.” Gi oko bakari so atene: “Mingi ti atënë so ayeke na yâ ti Fini Testament afa yingo ti Nzapa tongana mbeni ye, me mbeni zo pëpe; a bâ ni polele na lege ti kamba so ayeke na popo ti yingo na ngangu ti Nzapa.”
A yeke na lege ni ti tene azo agi li ti ala gbä na tënë so a tene ngangu ayeke mbeni zo. Ni la, ade ti ninga pëpe tongana a hunda azo na Amerika na ndo ti tënë ni, mingi ti ala ake tënë so a tene yingo vulu ayeke zo. Tâ tënë la ala tene so? Wala a lingbi e mä na bê na tënë ti awandara ti tënë ti nzapa so atene “Yingo Vulu ayeke mbeni Zo so ayeke biani nde na Babâ ni nga na Molenge ni”?
Ti wara nzoni kiringo tënë, a lingbi e bâ Mbeti ti Nzapa, Bible, so afa anzene nzene tënë na ndo ti yingo vulu. Bazengele Paul atene: ‘Atënë ti Mbeti ti Nzapa kue alondo na yanga ti Nzapa wani. Atënë ni ayeke fa ye na zo, ayeke ke sioni so zo asara.’—2 Tim. 3:16, Fini Mbuki, 1995.
Tongana mo gi ti hinga tâ tënë na ndo ti yingo vulu a yeke nzoni ngbanga ti so tâ tënë so alingbi ti zi lege na mo ti wara mungo maboko ti Nzapa. A si na mo awe ti bâ so mo lingbi pëpe ti gbu ngangu gi mo oko? Jésus amû zendo na adisciple ti lo, lo tene: “Ala ngbâ ti hunda ye, na fade a yeke mû ni na ala . . . Asinga ala so . . . ala hinga tongana nyen ti mû amatabisi so ayeke nzoni na amolenge ti ala, si fade Babâ so ayeke na yayu ayeke mû yingo vulu na ala so ahunda ni na lo pëpe?”—Luc 11:9, 13.
Na yâ ti a-article ti peko, e yeke bâ ye so Mbeti ti Nzapa afa na e na ndo ti yingo vulu. E yeke bâ nga tongana nyen yingo vulu alingbi ti duti mbeni ngangu so ayeke sara nzoni na yâ ti fini ti e.
[Kete tënë na lembeti 3]
Mbeti ti Nzapa afa na e ye na ndo ti yingo vulu