Ye so mo lingbi ti sara ti gbu nda ti Bible
2. Diko ni na nzoni bibe
A si na mo awe so mbeni kamarade ti mo atene na mo asioni tënë na ndo ti mbeni zo so mo tingbi na lo lâ oko pëpe? Me na ngoi so mo tingbi na zo ni, atënë ti kamarade ti mo ni asara si a yeke ngangu na mo ti bâ akode nga na anzoni sarango ye ti zo ni? Mara ti ye tongaso alingbi ti si na zo tongana a ndu tënë ti Bible.
BAZENGELE PAUL amû wango na ndo ti ye so alingbi ti si tongana e diko Bible na nzoni bibe pëpe. Lo tene tënë ti ambeni Juif ti ngoi ti lo, lo tene: “Ala yapu na kusala ti Nzapa, me a yeke na lege ti tâ hingango ye pëpe.”—aRomain 10:2.
Ambeni Juif ti ngoi ti akozo Chrétien ayeke lani nduru pëpe ti yeda so Jésus ayeke Messie, atâa so mbage ti Bible so a sû ândö na Hébreu afa ni polele. Dutingo ti Jésus ti Nazareth alingbi biani na aye so a fa na ndo ti Messie na yâ ti mbage ti Bible so nga lo sara ye ague oko na aye kue so aprophétie afa atene fade Messie ayeke sara. Ye oko, abibe so ayeke na lege ni pëpe alï ngangu na yâ ti bê ti gbâ ti aJuif na akanga lege na ala ti gbu nda ti Mbeti ti Nzapa.
Ye so afa na e nyen? A fa na e so a yeke kota ye ti duti na nzoni bibe na ngoi so e yeke diko Bible. Tongana abibe so ayeke na lege ni pëpe ayeke kozoni awe na yâ ti li ti e, a lingbi ti kanga lege na e ti gbu nda ti atâ tënë ti Bible.
Na tapande, mbeni wafango mbeti ti da senda-gi na ndo ti tënë ti nzapa na Caroline ti Banga (Amerika) atene so Bible ayeke “mbeni buku so azo la asû ni, so abibe ti azo si ayeke na yâ ni; mingi ti abibe so ayeke na yâ ni amä tere pëpe na alingbi pëpe ti fa na zo ye so a yeke nzoni lo sara na yâ ti gigi ti lo.” Tongana mbeni zo so ayeke diko Bible abâ ni tongana “mbeni buku so azo la asû ni,” bê ti lo ayeke apusu ande lo ti ke awango nga na akpengba-ndia ti yâ ni so ague nde na ye so bê ti lo aye.
Nde na so, Bible awa e ti manda ni nzoni. Mbeti ti Nzapa atene tënë ti azo ti Bérée ti ngoi ti Paul, atene: “Ala yeke tâ nduru ti yeda na tënë ni na ngoi so ala wara ni, na lâ na lâ ala yeke gi nda ti Mbeti ti Nzapa nzoni ti bâ wala aye so a fa na ala ayeke tongaso biani.” (Kusala 17:11). Legeoko tongana ti azo ti dikongo Bible so, a hunda peut-être ti tene mo ke abibe so ayeke na lege ni pëpe wala atënë ti kasango ndo so alingbi ti kanga lege na mo ti gbu nda ti Bible. Duti na nzoni bibe na ngoi so mo yeke diko Mbeti ti Nzapa, na duti na nzara ti hinga apendere tënë so Wa ni azia na yâ ni.