Ndani so a tisa azo ti bâ akua so a yeke sara na Béthel

“NYEN la ala yeke sara kâ?” Azo mingi so ayeke hon na kutukutu na tere ti kota Béthel ti aTémoin ti Jéhovah na Mogale City (Krugersdorp) so ayeke nduru na Johannesburg na Afrika ti Mbongo, ayeke hunda tënë so. Ni la, na lango 12 nga na 13 ti octobre ti ngu 2007, aTémoin ti Jéhovah ayeda ti zi yanga ti kota Béthel so polele. Ndani ayeke use: ti fa so asioni tënë so a yeke tene na ndo ti akua ti aTémoin ti Jéhovah ayeke mvene nga ti mû lege na azo so ayeke ga ti bâ Béthel ni ti bâ akua so aita ayeke sara kâ ti mû maboko na kua so Jésus Christ amû yanga ti tene a sara ni.​—Matthieu 28:19, 20.

Aita so asara kua na Béthel azia akota pancarte na yanga ti gbagba ni ti tene gango nzoni na azo so aga, nga ala kangbi ambeti ti tisango ndo na avoizin ti ala. A tisa azo so Béthel ayeke vo aye na tïtî ala nga na asewa ti ala. Ye ti pekoni ayeke so azo ahon 500 so ayeke aTémoin ti Jéhovah pëpe aga.

Mbeni ye so azo ague mingi ti bâ ni ayeke mbeni kota masini ti petengo ambeti (MAN Roland Lithoman). Na yâ ti ngbonga oko oko, masini so ayeke pete apériodique 90 000. Mbeni ye so apika bê ti azo so aga ayeke kota ndo so a yeke zia lâ oko oko tonne 14 ti ambeti na yâ ti acarton dä ti tene a tokua ni. A nzere na azo mingi nga ti bâ ndo so a yeke collé acarton ti peko ti ambeti dä. A-Témoin ti Jéhovah so ayeke sara kua na andokua nde nde ti Béthel ni aleke apendere ye tongana atableau, so na popo ni mo yeke wara mbeni mbeti so afa nduru tënë na ndo ti mbaï ti amasini ti petengo ambeti, ti londo na ti Pakara Gutenberg ti si na amasini ti petengo ambeti ti laso. Mbeni tableau ni afa aye so a yeke sara na Béthel si kua so ala yeke sara abuba ye tongana pupu pëpe. Na tapande, a zia mbeni masini na tere ti kota masini ti petengo ambeti ti zi asioni pupu so masini so ayeke tokua ni nga na guru ti fungo ti aye so ayeke sigigi na yâ ni. A zia nga na tere ti kota masini so mbeni masini so ayeke bungbi afuku ti kugbe-mbeti si asigigi pëpe.

Mbeni mbeti-sango ti ndo ni asigigi na mbeni article so na yâ ni a tene so azo 700 so ayeke futa ala pëpe na so alango na Béthel “ayeke awakua ti Jéhovah so amû tere ti ala na lo awe.” Mbeti-sango ni afa nga so na ndo so a yeke pete ambeti dä, “mo yeke wara saleté dä kete pëpe nga so aye kue ayeke tambela tâ gi na angbonga ni.” Mbeni koli so aye aTémoin ti Jéhovah pëpe aga ti bâ Béthel. Na pekoni, lo sû mbeti, lo tene: “Mbi gonda ala mingi. A yeke lakue la si azo ayeke bâ mara ti pendere ye tongaso pëpe.”

Azo mingi so abâ Béthel lani akiri singila mingi ndali ti aye so ala bâ, nga bê ti ala apika mingi ti bâ so Béthel ni asi singo na ambeti so azi nda ti Bible na yanga ti kodoro 151 na so Béthel ni ayeke pete ambeti ndali ti akodoro 18 so ayeke na mbongo nga na bê ti Afrika. Na ndo ti sese kue, aBéthel ti aTémoin ti Jéhovah ayeke zi yanga-da ti ala polele si azo aga abâ ni na angbonga ti kua. Ngbanga ti nyen mo hunda pëpe mbeni zo ti Béthel ti ndo so mo yeke dä ti hinga angbonga so azo alingbi ti gue ti bâ ni?

[Foto na lembeti 10]

Béthel ti Afrika ti Mbongo, na Mogale City

[Foto na lembeti 10]

Masini ti petengo ambeti (MAN Roland Lithoman)

[Afoto na lembeti 10]

Ndo so a yeke collé acarton ti peko ti ambeti

[Foto na lembeti 10]

Ndo ti tokuango ambeti

[Foto na lembeti 11]

Singo ti azo so aga ti bâ Béthel

[Foto na lembeti 11]

Mbeti ti tisango ndo