Fa ye na amolenge ti mo

ZIA e sara tënë na ndo ti ye so a iri ni kota bê. A si na mo awe ti bâ so a yeke ngangu na mo ti ye mbeni zo ndali ti so a yeke tene nzoni tënë ti lo, ndali ti so lo yeke pendere wala lo hinga ndo mingi?a​— Tongana aye so asi na mo, a fa peut-être so mo yeke sara kota bê na tere ti mbeni zo.

Kota bê alingbi ti bâ gigi na yâ ti sewa tongana ababâ na amama aye mbeni molenge ti ala mingi ahon amba ti lo. Bible asara tënë ti mbeni sewa so na yâ ni kota bê aga na mbeni kota kpale. Zia e bâ kpale so kota bê so aga na ni nga na ye so e lingbi ti manda na lege ti ye so asi lani.

Joseph ayeke na molongo 11 ti amolenge ti Jacob, nga aita ti lo ti koli asara kota bê lani na tere ti lo. Mo hinga ndani?​— A yeke ngbanga ti so babâ ti ala, Jacob, aye Joseph mingi. Na tapande, Jacob asara si a fü na Joseph mbeni kota bongo. Jacob aye Joseph mingi “teti lo yeke molenge ti lâ ti mbakoro ti lo” nga lo yeke kozo molenge so lo na wali ti lo Rachel so lo ye lo mingi adü.

Bible atene so ‘aita ti Joseph ahinga babâ ti ala andoye Joseph ahon ala kue; na ala ke lo’. Mbeni lâ, Joseph atene na sewa ti lo so lo bâ li ti lo so ala kue akuku na gbe ti lo, na même babâ ti lo kue asara ni. Bible atene so “bê asara aita ti lo tënë ti lo”, na même babâ ti Joseph asuku na lo ndali ti so lo fa peko ti bango li so.​—Genèse 37:1-11.

Mbeni lâ, na ngoi so Joseph ayeke na ngu 17, aita ti lo ague na mbeni yongoro ndo ti bata angasangbaga na angasa ti babâ ti ala. Tongaso, Jacob atokua Joseph ti gue ti bâ wala aita ti lo ayeke nzoni. Mo hinga ye so mingi ti aita ti Joseph aye ti sara na lo na ngoi so ala bâ lo na gango ni?​— Ala ye ti fâ lo. Me use na popo ti ala, Ruben na Juda, aye ti ala pëpe.

Na ngoi so azo ti dengo buze ayeke hon na lege ti gue na Egypte, Juda atene: “E kä lo.” Na ala sara ni. Na pekoni, ala fâ mbeni ngasa na ala yôro kota bongo ti Joseph na yâ ti mênë ni. Na ngoi so ala fa bongo ni na babâ ti ala, lo dekongo, lo tene: “Nyama ti sioni ate lo.”​—Genèse 37:12-36.

A si na mbeni ngoi, Pharaon gbia ti Egypte abâ Joseph na nzoni lê. A yeke ndali ti so Nzapa amû maboko na Joseph ti fa nda ti abango li use so Pharaon abâ. Kozo bango li ni ayeke na ndo ti abagara mbasambala so akono pendere nga na angengo ni mbasambala so aga na peko ti ala. Use bango li ni ayeke na ndo ti pendere li ti lê ti kobe mbasambala nga na pekoni na ndo ti li ti lê ti kobe so ahule. Joseph atene so abango li ni use kue aye ti sara tënë ti angu mbasambala so na yâ ni kobe ayeke lë ande mingi nga na angu mbasambala ti kota nzara so ayeke ga ande na pekoni. Teti so Pharaon amû yanga na lo, Joseph abungbi gbâ ti alê ti kobe na yâ ti angu so lê ti kobe alë gbani ndali ti ngoi ti kota nzara so ayeke ga na pekoni.

Na ngoi so kota nzara atï, fami ti Joseph so alango na yongoro ndo ayeke na bezoin ti kobe. Jacob atokua ayaya ti Joseph ti koli bale-oko na Egypte ti vo kobe. Ala si na devant ti Joseph, me ala hinga lo oko pëpe. Sân ti tene Joseph afa tere ti lo na aita ti lo, lo tara ala na lo bâ so ala yeke na vundu ndali ti ye ti sioni so ala sara lani na lo. Na pekoni, Joseph afa tere ti lo na ala. Ala na Joseph agbu tere na ngia.​—Genèse, chapitre 40 ti si na chapitre 45.

Ye so Bible afa ge na ndo ti kota bê afa nyen na mo?​— A fa so kota bê alingbi ti ga na kota kpale, a lingbi même ti pusu mbeni zo ti gi ti sara sioni na ita ti lo! Zia e diko Kusala 5:17, 18 nga Kusala 7:54-59, na bâ ye so kota bê apusu azo lani ti sara na adisciple ti Jésus.​— Na peko ti dikongo aversê so, mo bâ ndani so a lingbi e sara hange na kota bê?​—

Joseph aduti na fini a sara ngu 110. Lo dü amolenge na amolenge ni adü atara na lo, na atara ni kue adü nga amolenge. E hinga biani so fani mingi, Joseph afa na ala ti ye amba ti ala nga ti kpe ti sara kota bê.​—Genèse 50:22, 23, 26.

[Kete tënë na gbe ni]

Ahundango tënë:

○ Kota bê ayeke nyen?

○ Kota bê apusu aita ti Joseph ti koli ti sara nyen?

○ Ngbanga ti nyen Joseph apardone aita ti lo?

○ Ye so asi lani afa nyen na e?