Mo hinga Babâ ti mo ti yayu?

MO HINGA babâ ti mo nzoni? Tongana mo kono na yâ ti mbeni sewa so azo ni aye tere mingi, mo lingbi ti gi li ti mo gbä na mara ti hundango tënë tongaso. Mo lingbi ti kiri tënë, mo tene: ‘Mbi hinga lo nzoni ma!’ Ti tâ tënë ni, mingi ti azo ahinga aye so babâ ti ala aye nga na aye so lo ke. Ala hinga tongana nyen lo yeke sara ye na ngoi so mbeni ye asi nga tongana nyen lo yeke bâ lege ti sewa ti lo.

Ye oko, a si na mbeni ngoi, mo lingbi ti bâ so babâ ti mo asara mbeni ye so mo pensé lâ oko pëpe so lo lingbi ti sara ni. Na tapande, mbeni molenge-koli alingbi ti bâ babâ ti lo tongana mbeni zo so ayeke kpô mingi nga so lo yeke sara ye na ngangu pëpe. Me na ngoi so mbeni ye ti ngangu asi, hio tongaso, lo bâ so babâ ti lo asara ye na ngangu ti bata azo ti sewa ti lo si ye ti sioni asi na ala pëpe.

Ka Wasarango e, e hinga lo nzoni mingi? Bible asara tënë na ndo ti lo, atene: “Na yâ Lo, e yeke na fini, e yeke tambela, na e yeke.” (Kusala 17:28). Lo la lo mû na e fini; tongaso, lo yeke Babâ ti azo kue so ayeke na fini (Esaïe 64:7). Peut-être mo nga kue mo bâ ni tongaso, na bibe so ayeke nzoni nga ayeke na lege ni. Ye oko, e yeke na aye mingi ti hinga ni na ndo ti lo; na tongana e hinga aye so, a yeke ga na e aye ti nzoni nga a yeke sara si e duti na ngia.

Tongana mo hinga babâ ti dungo mo nzoni, ye so ayeke sara si mo ye lo mingi nga mo ne lo. Legeoko nga, tongana mo hinga Nzapa nzoni mingi, songo ti mo na lo ayeke kpengba mingi. Tongana mo hinga Nzapa nzoni mingi nga mo gi ti sara ye so bê ti lo aye, lo lingbi ti mû maboko na mo ti gbu ngangu na yâ ti akpale so ayeke si na mo.

Asarango ye ti Nzapa ayeke tongana nyen? A yeke nzoni asarango ye ti lo so apusu mo ti sara nyen na mbage ti lo? So mo hinga lo awe, a sara si mo bâ so a lingbi mo sara nyen? Mo yeke wara akiringo tënë ni na yâ ti article ti peko.

[Kete tënë na lembeti 3]

Tongana mo hinga azo nzoni, a yeke sara ngangu na ndo ti sarango ye ti mo na mbage ti ala