A hunda ti tene a sö fini ti azo!

NA MBENI gbata so ayeke nduru na Pittsburgh, Pennsylvanie na Amerika, gi hio tongaso mbeni ndo so a yeke hasa charbon ti gbe ti sese dä asi na ngu. Ye so asi akanga lege na azo ti hasango charbon ni 9 ti sigigi, na tongaso ala ngbâ na yâ ti ndo so ayeke na mètre 73 na gbe ti sese. Lango ota na pekoni ala sigigi, na ye ti sioni asi na ala pëpe. Nyen la a sara ti sö fini ti ala?

Azo ti songo azo so ayeke na akarte nga na mbeni boussole so amû lege na ala ti wara azo ni. Ala mû mbeni masini ala koro dû juska na ndo so azo ti hasango charbon so ayeke dä. Ala leke mbeni ye tongana da ti kukuru, ala yôro ni na yâ ti dû so ala koro ni juska na ndo so azo ni ayeke dä. Oko na oko, azo ni alï na yâ ti da ti kukuru so na a sigigi na ala. Ye so asara si azo ti hasango charbon so akui pëpe. Ala kue ayeke na ngia, bê ti ala adë nga ala kiri singila na azo so asö fini ti ala.

Mbeni ye ayeke kanga ande mingi ti e pëpe na gbe ti sese tongana ti so a si na azo ti hasango charbon so wala mbeni ye azia fini ti mingi ti e na lê ti kuâ pëpe. Ye oko, a hunda ti tene a sö fini ti e kue ndali ti so zo kue ayeke tï kobela, lo yeke ga mbakoro na nda ni lo yeke kui. Job so ayeke be-ta-zo atene: “Zo so wali adü lo ayeke na lâ mingi pëpe, na vundu ti lo asi singo. Lo sigigi tongana fleur, na a fâ lo na sese; lo kpe tongana gbede, na lo ngbâ pëpe.” (Job 14:1, 2). Atâa so Job atene tënë so a sara laso ngu 3 500 awe, tënë so angbâ lakue tâ tënë ndali ti so zo alingbi pëpe ti kpe kuâ. Atâa ndo wa la e duti dä, atâa e bata seni ti e tongana nyen, a hunda ti tene a sö e na yâ ti pasi, gango mbakoro nga na kui.

Azo ti senda-ye nga na ambeni zo nde ayeke sara ngangu ti tara ti sara si fini ti azo aninga ahon ti so azo ayeke sara laso. Mbeni bungbi afa so ye so ala zia na gbele ala ti sara ayeke “ti hon ndo ti kuâ so ayeke tongana mbeni wato so ayeke mû azo na ngangu”. Ala zia nga na gbele ala “ti mû maboko na azo so ayeke na yâ ti bungbi ni ti gi ti sara si azo akui mbeni pëpe.” Ye oko, guengo na li ni ti senda-ye nga na kota nzara so azo ayeke na ni ti sara si fini ti azo aninga ahon ti kozo asara pëpe si azo angbâ na fini a hon ngu 70 wala ngu 80 so Moïse asara tënë ni a sara ngu 3 500 awe.​—Psaume 90:10.

Atâa mo yeda na aye so Job atene na ndo ti fini nga na kuâ wala mo yeda na ni pëpe, a yeke si ande biani so tongana ngoi ayeke hon, mo nga kue mo yeke “kpe tongana gbede,” yongoro na akamarade ti mo, afami ti mo, da ti mo nga na aye so kue mo sara; so ti tene mo yeke kui. Gbia Salomon so ayeke lani na ndara mingi atene so “ala so ayeke na fini, ala hinga fade ala kui; me akinda ahinga ye oko pëpe, wala futa ayeke pëpe teti ala; teti azo adabe ala na akinda mbeni pëpe.”​—Zo-ti-fa-tene 9:5.

Bible afa na e polele so kui “akomande” na ndo ti azo tongana ti so mbeni sioni gbia ayeke komande. Biani, kui ayeke kota wato so a hunda ti tene a sö azo na gbe ti ngangu ti lo (aRomain 5:14; 1 aCorinthien 15:26). Atâa azo ti songo azo ayeke na kode mingi nga ala yeke na ye kue so a hunda ti sö na azo, ala lingbi pëpe ti sö fini ti mo biani biani. Ye oko, Jéhovah Nzapa so acréé azo aleke mbeni ye ti sö fini ti ala biani biani.

[Foto na lembeti 3]

Foto, Gene J. Puskar-Pool/Getty Images