Gingo ti wara akiringo tënë

“Azo awara lege ti wara aye so ala na asewa ti ala ayeke na bezoin ni, ala wara aye ti nginza mingi so ala yeke ândö na ni pëpe: aye tongana akutukutu so ngere ni ayeke ngangu mingi. Atâa so kue, e ngbâ lakue ti hunda tere ti e, e tene: ‘Ngbanga ti nyen e yeke na fini?’ Ngbanga ti nyen azo ayeke gbugburu tere laso ti hon amba ti ala?”​—David Myers, mbeni wafango mbeti na ndo ti asarango ye ti zo na da senda-gi ti Amerika (Hope College, Holland, Michigan, U.S.A.)

MO YEKE kiri tënë tongana nyen na tënë so wafango mbeti so ahunda? Ambeni zo abâ so a yeke kota ye pëpe ti tene zo abuba ngoi ti lo ti wara kiringo tënë ni. Ye oko, ti tara ti sara sanka ti hundango tënë so ayeke tongana ti so zo agi ti sara sanka ti kete tênë so alï na yâ ti poro ti lo: zo ni alingbi ti ngbâ ti tambela, me kete tênë so ayeke ngbâ lakue ti so gbe ti gere ti lo.

Tongana a si na mo awe ti hunda tere ti mo na ndo ti nda ni so e yeke na fini, mo yeke gi mo oko pëpe. Mbeni bungbi (L’Enquête sur les valeurs universelles) so ayeke hunda azo na ndo ti sese kue na ndo ti anzoni sarango ye ti zo afa so azo mingi na yâ ti akodoro mingi ayeke gbu li ti ala na ndo ti “nda ni so ala yeke na fini.”

Tongana mo ye ti wara tâ siriri ti bê, a yeke nzoni mo kiri tënë na akpengba hundango tënë ota so:

E bâ gigi tongana nyen?

Ngbanga ti nyen e yeke na fini?

Gigi ti e ti kekereke ayeke duti ande tongana nyen?

Mo lingbi ti wara anzoni kiringo tënë na ahundango tënë so na ndo wa? Ahon ti fa atënë ti bê ti zo, a-article ti peko ayeke fa ande akiringo tënë ni so ayeke na yâ ti Mbeti ti Nzapa, Bible. E hunda na mo ti zi Bible ti mo nga ti bâ ye so Bible atene.