Dutingo na tâ be-ti-molenge ayeke kete ye pëpe

TI AZO mingi, tâ be-ti-molenge alingbi na sese ti laso pëpe. Mingi ni, azo so ahinga ti fa lege na amba ti ala nga so akpa azo so ye ti ala ayeke ga nzoni ayeke azo so aye gi ti hon amba ti ala, azo ti baba nga azo so aye gi ti sara ye ti li ti ala. Mingi ni, azo asara nzara ti duti tongana azo ti mosoro nga tongana azo so iri ti ala awu mingi. Me ala yeke pëpe na nzara ti duti tongana azo so ayeke na tâ be-ti-molenge. Azo so ye ti ala ayeke ga nzoni ayeke pika lakue kate ti ala, ala tene so a yeke gi na lege ti ngangu ti ala wani si aye ti ala aga nzoni. Ahon ti tene ala duti na tâ be-ti-molenge, na baba ala yeke gonda tere ti ala ndali ti akpengba ye so ala sara.

Mbeni zo ti gingo nda ti ye ti kodoro ti Canada asara tënë ti mbeni fini sarango ye so ayeke bâ gigi na yâ ti kodoro ti lo. A yeke tënë ti azo ti kion so ayeke pensé gi na ala wani. Ambeni zo atene ti ala so e yeke na yâ ti mbeni sese so azo abâ so ti wara nzerengo ti gigi ayeke kota mingi ahon ti sara ye so a hunda na ala. Ala yeda nga so azo ayeke pensé gi na ala wani ahon ti kozo. Na yâ ti mara ti sese tongaso, tâ be-ti-molenge akpa pëpe ye ti tene a hunda na azo ti duti na ni.

Tâ tënë, azo mingi ayeke yeda so tâ be-ti-molenge ayeke nzoni teti ambeni zo, ngbanga ti so a yeke ngangu pëpe ti duti na tere ti mara ti azo tongaso. Ye oko, na yâ ti sese ti e so zo kue aye gi ti hon mba ti lo, ambeni zo abâ so tongana ala wani ayeke na tâ be-ti-molenge, fade azo ayeke bâ ala tongana awokongo zo.

Mbeti ti Nzapa atene kozoni awe so na ngoi ti e, fade azo ayeke ‘pika kate ti ala na ala yeke gonda tere ti ala.’ (2 Timothée 3:1, 2, Fini Mbuki, 2001). Mo yeda so prophétie so ayeke ga tâ tënë? Mo bâ so a yeke mbeni nzoni ye ti duti na tâ be-ti-molenge? Wala mo bâ so azo ayeke bâ ande zo so ayeke na tâ be-ti-molenge tongana mbeni wokongo zo, so a yeke ngangu pëpe ti wara go na ndo ti lo?

Tâ tënë ni ayeke so Bible afa ngbanga ti nyen a yeke nzoni ti bâ na nene ni tâ be-ti-molenge nga ti gi ti duti na ni. Bible afa nzoni bango ndo na mbage ti dutingo na tâ be-ti-molenge. Bible afa nga so tongana zo aduti biani na tâ be-ti-molenge lo yeke fa so lo yeke na ngangu, me pëpe so lo yeke wokongo zo.

[Foto na lembeti 3]

A lingbi e bâ aye so e sara tongana nyen?