Sarango sioni ahon ndo ni laso?
Mbeni molenge-koli so aye ti hinga ye mingi abâ mbeni ye na sese na lo mû ni na maboko ti lo. Ye ni so ayeke mbeni lê ti ngombe so a yeke lu ka ni na gbe ti sese; na lê ti ngombe ni asungba na asara si lê ti lo abuba nga a buba tere ti lo biani biani. Mbeni mama so adü bébé fini fini ahonde bébé ni na gbe ti asaleté so ayeke na tere ti lege na lo hon. Mbeni koli so a tomba lo na kua akiri mbeni lâ na place ti kua ti lo, lo pika na ngombe azo kue so lo bâ ala nga na pekoni, lo fâ tere ti lo. Mbeni koli so azo ayeke ne lo abungbi na amolenge na ngangu.
YE TI mawa ni ayeke so atondo ti amara ti asioni sarango ye tongaso ayeke mingi laso. Ahon so, azo ayeke mä ambeni tondo nde mingi ahon ti ala so e sara tënë ni fade; a yeke atondo na ndo zingo mbeni mara ti zia mbeni nde na place ni, na ndo gingo ti hunzingo mbeni mara nga na ndo sarango ye ti aterroriste. Mbeni mbeti-sango so a sû na ngu 1995 atene: “Ngoi ti fadeso ayeke tâ sioni mingi; ti londo na ngu 1900 ti ga na ni, a yeke biani ngoi ti Satan. Lâ oko pëpe na yâ ti mbaï ti azo, azo aduti na kode nga na nzara ti fango azo kutu mingi ndali ti mara ti ala, bungbi ti Nzapa ti ala wala dutingo ti ala na yâ ti kodoro.”
Na oko ngoi, azo ayeke buba nzoni pupu nga na sese, azo ayeke hunzi amosoro ti gbe ti sese nga na akeke. Nga, ala yeke fâ anyama mingi na tongaso ambeni mara ti anyama angbâ mingi pëpe. Azo alingbi ti hon ndo ti asioni ye so kue na ti duti nzoni ahon ti kozo nga na mbeto pëpe? Wala gingo ti sarango ni ayeke tongana ti so zo agi ti kanga lege na ngu so asua na ngangu na lege ti balai? Mbeni wafango mbeti so a sû atënë mingi na ndo ti aye ti sioni atene: “Mbi yeke lani na kota nzara ti sara si sese aga nzoni mingi ahon ti kozo. Me, ye oko achangé pëpe.” Peut-être mo nga mo bâ ni tongaso.
A lingbi ti haka lege so aye ayeke changé na sese na mbeni bateau so ayeke hon na lê ti ngu. Lâ oko oko, ngu ni ayeke yengi mingi ahon ti kozo na alingbi ti sara si azo ti yâ ti bateau ni akui. Atâa so zo oko aye pëpe ti hon na lê ti mara ti ngu tongaso, angangu kue so azo ayeke sara ti changé lege atï na ngu. Bateau ni angbâ gi lakue ti sua na lê ti ngu ni so ayeke yengi mingi, na zo oko alingbi ti kanga lege na ni pëpe.
A lingbi ti tene so azo so ayeke mbilimbili-kue pëpe ayeke na gunda ti bubango ti aye so e yeke bâ na sese so (aRomain 3:23). Ye oko, so aye ti sioni ayeke mingi, amû ndo kue nga angbâ lakue ti gue na li ni, a fa so a yeke gi azo oko pëpe si ayeke na gunda ti aye so. A yeke tâ tënë so mbeni créature so e lingbi ti bâ lo pëpe, so ayeke na ngangu mingi na so ayeke sioni mingi ayeke pusu azo ti sara sioni? Tongana a yeke tongaso, créature ni so ayeke zo wa? Na tongana nyen e lingbi ti bata tere ti e ndali ti lo? Article ti peko ayeke kiri tënë na ahundango tënë so.
[Lingu ti foto na lembeti 3]
© Afoto ti Heldur Netocny/Panos