Daniel na badge ti lo ti kota bungbi

JÉSUS asuku na amokonzi-nzapa so abâ tere ti ala mbilimbili na so asara ngonzo tongana ala bâ akete molenge so asepela Nzapa na lê ti azo. Na lege ni, Jésus ahunda ala: “I diko na Mbeti lâ oko pëpe? Na lege ti tënë so asigigi na yanga ti amolenge na ti ala so ade ti nyon me, Mo sara si tënë ti merci aga ye so alingbi kue.”—Matthieu 21:15, 16.

Daniel ayeke mbeni molenge ti ngu omene so asara bungbi na mbeni kongregation ti yanga ti Russe na Zamani. Sarango ye ti lo afa so amolenge angbâ lakue ti sepela Jéhovah. Lo na mama ti lo nga na ita ti lo ti wali ague na kota bungbi ti aTémoin ti Jéhovah na Duisburg. A yeke ti kozoni ti tene ala gue na mbeni kota bungbi tongaso. Ye kue ayeke lani fini ni na lê ti ala: hôtel, azo mingi so abungbi, dutingo place oko lango ota, batême nga na drame. Sarango ye ti Daniel ayeke lani tongana nyen? Lo sara ye nzoni mingi.

Na lundi na peko ti kota bungbi ni, Daniel azingo hio ti gue na ekole. Me ye wa angbâ na ndo kazaka ti lo? Badge so azo so ague na kota bungbi ni ayü! Mama ti lo atene na lo: “Kota bungbi ahunzi awe. Laso mo lingbi ti zi badge ni.” Me Daniel atene: “Mbi ye si azo kue ahinga ndo so mbi gue dä na ye so mbi manda kâ.” Tongaso na lango ni kue na ekole, lo sara baba ti badge ti lo so lo yü. Tongana madame ti lo ahunda lo na ndo ni, lo fa peko ti kapa ti kota bungbi ni na lo.

Na sarango tongaso, Daniel amû tapande ti amolenge-koli na amolenge-wali saki mingi mingi so na lê ti azo asepela Jéhovah teti angu ngbangbo mingi fadeso.