“Ndali ti mbeni molenge ti ngu gumbaya”
LAKUE tongana aTémoin ti Jéhovah asi na yanga da ti lo, Wiesława, so ayeke na mbongo ti Pologne, ayeke yamba ala nzoni me na pekoni lo ke ti mä tënë ti ala. Mbeni lâ, Samuel, so ayeke na ngu gumbaya, na mama ti lo asi na yanga-da ti Wiesława. Ti so ni so, lo yeda ti mä tënë ni na lo mû mbeni périodique so asara tënë ti paradis na ndo ti sese.
Teti so lango ti Mémorial ti kui ti Jésus Christ aga nduru, Samuel aye ti tisa Wiesława ti gue dä. Tongaso, lo na mama ti lo ague na mbeti ti tisango ndo na Wiesława ti tene lo ga na Mémorial ni. Teti so lo bâ molenge-koli ni ayü bongo pendere, Wiesława ahunda ala ti ku lo kete na lo gue ti yü bongo nzoni. Tongana lo sigigi, lo mä tënë so Samuel atene na lo, na lo yeda na tisango ndo ni. Na pekoni, lo hunda ala, lo tene: “Mbi gue gi mbi oko wala mbi na koli ti mbi?” Na lo kiri lo tene: “Même tongana koli ti mbi ague pëpe, mbi yeke ga. Mbi yeke gue ndali ti mo, Samuel.” A nzere na Samuel mingi ti bâ so wali ni asara ye alingbi na tënë ti yanga ti lo.
Na ngoi ti diskur ti Mémorial ni, Samuel aduti na tere ti Wiesława na lo yeke zi na lo aversê ti Bible so a yeke fa. Ye so adö bê ti wali ni mingi. Mémorial ni anzere na lo nga lo yeke na ngia so a fa akota tënë ni pendere mingi si zo alingbi ti gbu nda ni hio. Bê ti lo apika nga ndali ti so a yamba lo nzoni nga teti nzobe so aita ti kongregation ni afa na mbage ti lo. A to nda ni na ngoi ni so, Wiesława abâ tënë ti Nzapa na nene ni na lo to nda ti gue lakue na bungbi ti aTémoin ti Jéhovah. A de ti ninga pëpe lo tene: “Kamene asara mbi ndali ti so mbi ye lani pëpe ti mä ala na ngoi so ala yeke si na yanga da ti mbi. Na mbi lingbi ti tene so mbi yeda ti mä tënë ti i gi ndali ti mbeni molenge-koli ti ngu gumbaya, so iri ti lo ayeke Samuel.”
Legeoko tongana Samuel so ayeke na Pologne, mingi ti aTémoin ti Jéhovah so ade maseka ayeke sepela Nzapa na tënë ti yanga ti ala nga na nzoni tambela ti ala. Tongana mo kue mo yeke maseka, peut-être mo nga mo lingbi ti mû maboko na azo ti nzoni bê ti bâ aye ti yingo na nene ni.