Fade sese so aga ye ti héritier ti azo ti tâ be-ti-molenge
Pakara Jean-Marie Pelt, mbeni wandara ti France so abâ tënë ti aye tongana gbako, akeke nga na akota ngu, atene: “Mbi pensé so mbeni lâ gigi ayeke changé kue nga a yeke kiri ti leke aye kue. . . . Ye ni so ayeke ti fade fadeso pëpe, a ngbâ a yo mingi. A yeke si ande na ngoi so e yeke wara fini yayu na fini sese.”
TETI so vundu asara azo ndali ti bubango ti aye tongana gbako, akeke, akota ngu nga na nzoni duti ti azo na ndo sese, azo mingi ayeke na nzara ti bâ sese so ti gbian ti ga paradis. Biani, tënë ti bango sese so aga paradis ayeke mbeni fini ye pëpe. A ninga mingi awe so Bible amû zendo ti kiringo ti leke Paradis na ndo sese. Na popo ti aversê ti Bible so azo ahinga ni nzoni mingi, a yeke wara atënë ti Jésus so atene “azo so ayeke na tâ be-ti-molenge, . . . fade sese so aga ye ti héritier ti ala.” Nga “e ye ala sara na sese ye so bê ti Mo aye legeoko tongana ala sara na yayu.” (Matthieu 5:5; 6:10). Ye oko, laso, a yeke azo mingi pëpe si ayeda so azo ti tâ be-ti-molenge ayeke duti na ndo mbeni sese so aga Paradis. Ti mingi ti azo so ala tene ala yeke aChrétien, tënë ti Paradis ni alï ngu awe.
Mbeni mbeti-sango ti France (La Vie) afa ngbanga ti nyen aCatholique amä na bê mbeni pëpe na tënë ti paradis, atâa na yayu wala na sese. Mbeti-sango ni atene: “Atâa so na yâ ti angu 1 900 so ahon abua ti Eglize Catholique ayeke fa lani [tënë ti] paradis mingi, fadeso ala yeke fa tënë ni so mbeni pëpe na ngoi so amembre ti Eglize ti ala ayeke bungbi ti gbu li na ndo tënë ti Nzapa, na ngoi ti abungbi ti ala ti dimanche, na angoi ti ekole ti abua nga na catéchisme.” A bâ so tënë Paradis aga “mbeni ye so zo ahinga li ti lo na ni mbeni pëpe.” Ambeni pasteur na ambeni bua ake na mbana ti fa tënë ni ndali ti so “a yeke gue na zo ti pensé mingi gi na dutingo na ngia na ndo sese.”
Ti Pakara Frédéric Lenoir, mbeni wandara so amanda ye na ndo abungbi ti nzapa, tënë Paradis ni aga fadeso “image ti mbeni ye oko so azo kue ayeke na ni na li ti ala.” Legeoko nga, Jean Delumeau, so lo yeke wasungo mbaï nga so lo sû gbâ ti abuku na ndo tënë ti paradis, apensé so gango tâ tënë ti azendo so Bible amû na ndo paradis andu mbeni ye nde me paradis na ndo sese pëpe. Lo tene: “Tongana a hunda awamabe a tene, ‘Tënë ti paradis ni aga fadeso tongana nyen?’ Ala yeke tene: Grâce na Sauveur ti e so a zingo lo na kuâ, mbeni lâ e kue e yeke duti beoko nga na ngia.”
A yeke na lege ni ti ngbâ ti pensé lakue na ndo tënë ti paradis na ndo sese? Ye nyen ayeke si ande na sese so? Zo alingbi ti hinga ye nzoni na ndo kekereke wala pëpe? Article so ayeke ga ayeke kiri tënë na ahundango ndo so.