Royaume ti Nzapa ayeke nyen?

SO TÂ ye ti ngangu si asi lani hio na yâ mbaï ti azo! Mbeni ange alondo ti ke ngangu ti komande ti zo so asara lo. Zo ti kpengba-li so ahanda Eve ti te lê ti keke so a gbanzi lo na koli ti lo ti te ni. Ange so ayeke sara tënë ti Eve na koli ti lo Adam tongana lo tene: “I lingbi kui biani pëpe, teti Nzapa ahinga na lâ ni so i te lê ni, fade lê ti i alungula, na i ga tongana Nzapa, i hinga nzoni na sioni.” (Genèse 2:16, 17; 3:1-5). Na pekoni, a iri ange so asara kpengba-li so Zabolo na Satan.—Apocalypse 12:9.

Eve amä Satan? Bible atene na e: “Wali ni abâ keke so ayeke nzoni teti kobe, a nzere na lê, na a yeke keke so bê aye si zo awara ndara, lo kamata lê ni, lo te; lo mû na koli ti lo so ayeke na tere ti lo, na lo te nga.” (Genèse 3:6). Biani, Adam na Eve amû peko ti Satan na yâ kengo yanga ti Nzapa. Na nda ni, ala girisa Paradis, na tongaso amolenge ti ala nga awara lege ti duti dä pëpe. Ahon ti tene amolenge so ala yeke dü na pekoni aduti mbilimbili-kue nga awara fini ti lakue lakue, Adam na Eve ayeke mû na ala siokpari nga na kui.​—aRomain 5:12.

Gi na ngoi ni so, Jéhovah Nzapa, Kota Gbia ti dunia kue asara nyen? Lo leke mbeni ye ti pardone siokpari ti azo (aRomain 5:8). Jéhovah Nzapa azia nga na sese mbeni ngorogbia ti leke na kpale so azo ayeke na yâ ni. A iri ngorogbia so “royaume ti Nzapa”. (Luc 21:31). Nzapa asigigi na Royaume so ti duti mbeni kete yanga-ti-komande so aga na peko ti kota yanga-ti-komande ti lo; na lo sigigi na ni ti sara na mbeni mbilimbili ye.

Me, ye nyen Royaume ti Nzapa ayeke sara? Ambeni ye so a hinga Royaume so na ni ayeke nyen? Tongana a haka aye so na komandema ti azo, a yeke tongana nyen? Royaume ni ato nda ti komande lawa? E yeke bâ atënë so kue na yâ ti article so aga na peko.