Ngere ti mbeni “ta so ayeke ngangu pëpe”

BAZENGELE Pierre asû na mbeti, lo tene: “I akoli, i duti na awali ti i na lege ti ndara, na i yekia awali, tongana ta so ayeke ngangu pëpe.” (1 Pierre 3:7). So Mbeti ti Nzapa atene mbeni wali ayeke tongana “ta so ayeke ngangu pëpe” akiri na nengo ti awali na peko? Zia e bâ ye so Pierre, so yingo ti Nzapa apusu lo ti sû tënë so, aye mbilimbili ti tene.

Tënë ti yanga ti Grec so a kiri pekoni na “yekia” aye ti tene ti bâ mbeni ye tongana “ye so ayeke na ngere”, ti mû “nengo na mbeni ye.” Tongaso, a lingbi koli so ayeke Chrétien asara ye na wali ti lo na nzobe, lo bâ wali ti lo tâ tongana mbeni ta so akpengba pëpe, ta so ayeke ti ngere ngangu. Ye so akiri na nengo ti wali ni na peko oko pëpe. Na tapande, foto so mo bâ na lê ti mbeti so ayeke ti mbeni lampe so a leke ni na verre. So ayeke mbeni pendere lampe, me a bâ ni tongana mbeni ye so akpengba oko pëpe. Ye so asara si ngere ni atï? Oko pëpe! Na ngu 1997, a kä kozo mara ti lampe ni so, na ngere ni ayeke ngbundangbu oko na ndo ni kutu ngbangbo omene tongaso! So a leke lampe so na mbeni ye so akpengba pëpe asara si ngere ni ayeke ngangu, me a kiri na ngere ni na peko pëpe.

Legeoko nga, ti yekia mbeni wali tongana mbeni ta so ayeke ngangu pëpe akiri na nengo ti lo na peko pëpe. Ti duti na wali ti lo na “lege ti ndara” aye ti tene so a lingbi koli abi bê ti lo na ndo so wali ti lo akpengba dä nga ndo so lo woko dä, aye so lo ye na so lo ke, bango ndo ti lo nga na atënë ti bê ti lo. Mbeni koli so ayeke bi bê na wali ti lo ayeke hinga kangbi so ayeke na popo ti sarango ye ti lo na ti wali ti lo nga lo yeke girisa ni pëpe. Lo yeke ne wali ti lo alingbi na ni “si lege ti sambela ti [lo koli ni] akanga pëpe.” (1 Pierre 3:7). Koli so ane dutingo ti wali ti lo pëpe, songo ti lo na Nzapa ayeke buba. Ti tâ tënë ni, Mbeti ti Nzapa akiri na nengo ti awali na peko pëpe. Nde na so, lo ne ala mingi.

[Lingu ti foto na lembeti 32]

© Christie’s Images Limited 1997