Ye so Nzapa aleke teti sese so ayeke nyen?
TONGANA mo bâ mbeni yaka so akobe ti lê ni asara pendere, ngbanga ti nyen mo yeke gonda ni? Wala tongana mo mä pendere toto ti andeke, ngbanga ti nyen a yeke nzere na mo ti dengi mê nzoni ti mä ni? Ka tongana mo bâ foto ti mbeni kodoro wala mbeni ndo so ayeke pendere mingi, ngbanga ti nyen nzara ti kodoro ni so wala ndo ni so ayeke sara mo?
Kiringo tënë na ahundango tënë so kue ayeke gi oko: A sara e ti duti na fini na yâ ti Paradis! Paradis ni ayeke ndo so akozo babâ na mama ti e, Adam na Eve, ato nda ti gigi ti ala dä. A yeke ala la azia nzara ti Paradis ni na yâ ti e; me ti ala, a yeke Jéhovah Nzapa, Wasarango ala, si azia nzara ni na yâ ti ala. Jéhovah Nzapa ahinga so e azo e yeke duti na ngia mingi tongana e yeke na yâ ti Paradis teti so lo sara e ti wara ngia na yâ ti mara ti pendere ndo tongaso.
Ngbanga ti nyen Jéhovah aleke sese? “Lo leke sese so si azo alingbi duti dä.” (Esaïe 45:18). Jéhovah so “asara sese” so azia lani Adam na Eve na yâ ti mbeni pendere paradis so ayeke yaka ti Eden (Jérémie 10:12; Genèse 2:7-9, 15, 21, 22). Biani, tere ti ala anzere lani mingi ti bâ angu, akongö na akeke ti yaka ni. Ala lingbi lani ti bâ apendere ndeke na lê ti nduzu nga na amara ti anyama ndenge na ndenge so ayeke fono na ndo sese; mbeni oko ti sara sioni na zo ayeke dä pëpe. Asusu na ambeni nyama ayeke fono na yâ ti ngu so lê ni ayeke nzoni. Nzoni ye so ahon atanga ni kue ayeke so Adam na Eve ayeke lani koli na wali. Ala lingbi fade ti dü amolenge ti yâ ti ala nga ti sara si Paradis so a zia ala na yâ ni akono. Ala lingbi fade ti duti na ngia na tere ti amolenge ti ala so ayeke ga gi gbani.
Atâa so sese ni laso ayeke paradis pëpe, a lingbi ti haka ni na mbeni da so azo ti yâ ni ayeke na ngia. Sese so Nzapa ti e amû na e na so ayeke tongana mbeni da ayeke na aye kue so e yeke na bezoin ni: ye tongana lumière, ndowa, ngu na kobe. Lumière na ndowa so lâ ayeke tokua nga na sungo ti nze ayeke aye so anzere na e mingi (Genèse 1:14-18). Na gbe ti sese, a yeke wara aye tongana pétrole so e lingbi ti mû ti sara na wâ ti duti na tere ni. Lege so ngu ayeke pika na akiri na nduzu nga na aye tongana abale, angu-lende na akota ngu ti ingo asara si e yeke na ngu. Nga, pere amû ndo ti sese.
Legeoko tongana ti so a yeke bata kobe na yâ ti da, sese nga ayeke na agbâ ti kobe ti lo. Na lege ti akobe na lê ti yaka nga na alengo ti akeke, Jéhovah ‘amû na e ngoi ti lengo kobe na ngia alingbi na bê ti e.’ (Kusala 14:16, 17). Teti so sese ayeke tongana mbeni pendere da awe, tara ti bâ na li ti mo ye so lo yeke kpa ni ande tongana Jéhovah aleke ni si a ga mbeni paradis!
[Lingu ti afoto na lembeti 2]
KOZO LEMBETI NI: Sese: NASA photo; Atongoro: NASA, ESA na AURA/Caltech