Lege ti ndu bê ti molenge

A SARA mo vundu pëpe ti bâ mbeni molenge na sarango angia ti bira? Amara ti sarango ye tongaso amû ndo kue laso na popo ti akete molenge ndali ti so sarango ngangu alï même na yâ ti aye ti ngia. Tongana nyen si mo lingbi ti mû maboko na mbeni molenge ti changé aye ti ngia ti bira ti lo na aye ti ngia ti siriri? Waltraut, mbeni Témoin ti Jéhovah so ayeke wali missionnaire na so aninga mingi na Afrika, awara lege ti mû maboko na mbeni molenge ti sara ni.

Ndali ti tënë ti bira, Waltraut akpe kodoro so lo yeke dä lani ti gue na mbeni kodoro ti Afrika. Kâ, lo to nda ti manda Bible na mbeni wali so ayeke na molenge-koli ti ngu oku. Lakue tongana Waltraut aga ti sara étude na mama ti molenge so, lo yeke bâ molenge ni na sarango ngia na kete ngombe ti plastique, oko ye ti ngia so lo yeke na ni. Waltraut abâ lo lâ oko pëpe na hakango ngombe so na tere ti mbeni ye. Me, molenge ni amû ngoi ti lo kue ti zi ngombe ni na ti kanga ni, mo bâ mo tene lo ye ti zia ambeni fini lê ni dä.

Waltraut atene na molenge so: “Werner, mo hinga nda ni so mbi yeke na kodoro ti mo ge? A yeke ngbanga ti so mbi kpe lani asioni azo so ayeke pika amba ti ala na mara ti ngombe ti mo so. Mo pensé so pikango ngombe ayeke nzoni?”

Na vundu na bê, Werner akiri tënë: “Ên-ën. A yeke nzoni pëpe.”

Waltraut atene: “Mo yeke na raison.” Na pekoni lo kiri lo hunda lo: “Mo hinga nda ni so mbi yeke ga yenga na yenga ti bâ mo na mama ti mo? A yeke ngbanga ti so aTémoin ti Jéhovah aye ti mû maboko na amba ti ala ti duti na siriri, siriri na Nzapa nga na azo ti tere ti da ti ala.” Teti mama ti Werner ayeda na ni, Waltraut atene na molenge so: “Tongana mo mû na mbi ngombe ti mo so, mbi yeke bi ni na ngonda, na mbi yeke sara kue ti tene mo wara mbeni pendere oto ti ngia.”

Werner amû ngombe ti ngia ti lo ni na Waltraut. Atâa so a hunda na lo ti ku ayenga osio tongaso, Werner awara fini ye ti ngia ti lo. Werner ayeke na ngia lani ti wara mbeni oto ti ngia so a leke ni na keke.

Mo yeke mû ngoi ti sara tënë na amolenge ti mo, ti tara ti ndu bê ti ala na ti pusu ala ti bi aye ti ngia so akpa ye ti bira? Tongana a yeke tongaso, mo yeke fa na ala ambeni ye so ayeke mû maboko na ala na yâ fini ti ala kue.