Kuâ: tâ mbeni sioni ye!

ARNOLD TOYNBEE, mbeni zo ti kodoro ti Angleterre so ayeke wasungo mbaï, atene: “A to nda ni na lâ ti dungo zo, zo alingbi ti kui na ngoi kue.” Lo kiri lo tene: “Na nda ni, kuâ ni aga mbeni ye so zo alingbi ti kpe ni pëpe.” Tongana mbeni sewa ti e wala mbeni kota kamarade ti e akui, e yeke biani na kota vundu.

A sara angu saki mingi awe si kuâ aga tâ mbeni sioni ye na tere ti azo. Tongana mbeni zo so e ye lo mingi akui, e bâ so ngangu ti e kue ahunzi. Kuâ ayeke bâ yâ ti azo pëpe; mbeni zo ti kpe ni ayeke ti lo dä pëpe. Na gbele kuâ, e kue e ga tongana akete molenge so ayeke na ngangu oko pëpe ti sara mbeni ye. Atâa mo yeke na mosoro mingi wala na ngangu mingi, mo lingbi pëpe ti kanga lege na kuâ. Azo so ahinga ndo mingi ayeke na tënë ti tene pëpe. Awangangu nga na azo so ayeke ngangu pëpe kue ayeke toto.

Mara ti vundu so asi lani na Gbia David ti Israël ti giriri na ngoi so molenge ti lo Absalom akui. Tongana lo mä tënë ti kuâ ti Absalom, David atoto na lo tene: “O molenge ti mbi Absalom! O molenge ti mbi Absalom! mbi ye ti kui na place ti mo! O Absalom! molenge ti mbi! molenge ti mbi!” (2 Samuel 18:33). David, so ayeke mbeni ngangu gbia nga so akinda angangu wato mingi, alingbi pëpe ti sara mbeni ye; oko ye so lo lingbi ti sara lani ayeke gi ti hunda ti tene “wato ti nda ni” so “ayeke kui” afâ lo na place ti molenge ti lo.​—1 aCorinthien 15:26.

Mbeni yorö ti kuâ ayeke dä? Tongana yorö ni ayeke dä, beku wa akuâ ayeke na ni? Asewa ti e so akui awe, e yeke kiri ti bâ ala ande? Use article ni ayeke kiri tënë na ahundango tënë so.